Charles Ndeumane
Nonande ongundu yoAction for Democracy Movement (ADM) opo ya totwa nuumvo, omunashipundi gwayo gwopashigwana Paulus Kambonde okwa ti oye na omukumo neinekelo kutya otaya ka mona mo iititatu iyali momahogololo gopaupresidente oshowo iilyo yomutumba gwopashigwana noya uvaneke tayi ka eta omalunduluko omanene ngoka taga etele oshigwana omauwanawa ogendji, nomuthindo otagu ka dhengwa paanyasha oshoka anuwa oya ninga oomvula odhindji ya patelwa kondje koompito dha yooloka.
Pethimbo ndika ongundu yo-ADM yi ipyakidhila niigongi yomahwahwameko opo yi gwedhe komwaalu gwaayambidhidhi yawo, oya pititha omukanda moka ya ndjandjukununa omathaneko gawo. Kambonde okwa ti aantu oye shi noye uvite ko omalalakano nomathaneko gongungu yo-ADM sho osho sha eta yi kale yi na aalunduli oyendji nonande opo ya totwa.
Kambonde okwa ndjandjukununa gamwe gomomathaneko go-ADM ngoka tayi ka tula miilonga ngele oye shi enditha nawa momahogololo.
Aalongwantu mboka inaaya mona iilonga
Kambonde okwa ti ongungu yo-ADM otayi ka tula po omwaalu gwoshimaliwa tashi ka pewa aanyasha mboka ya mana omailongo gawo kiiputudhilo yopombanda ashike inaya mona iilonga oshoka ongundu oya ndhidhilike kutya aanyasha mboka otaya mono iihuna moonkambadhala dhokukonga iilonga molwomangambeko gopashimaliwa. “Ethimbo limwe omuntu okwa ithanwa komapulaapulo ashike ke na oshimaliwa sholefa opo a ye ko, nenge oshimaliwa shokuninga ookopi. ADM ota ka pa aalongwantu mbaka oshimaliwa shokwiikwathela manga taya kongo iilonga, yo ngele ya mono iilonga tatu ya kutha mo momusholondondo gwaamboka haya mono oshimaliwa shoka.”
Uuthemba waaniilonga
Ongundu yo-ADM oya ti oya hala okuninga omalunduluko omanene miipambele yaaniilonga oshoka anuwa oya ndhidhilike kutya omahangano ogendji gaakwiilongo otaga longitha Aanamibia moonkalo kaadhi li nawa unene tuu ngele tashi ya koondjambi. Kambonde okwa ti ADM ota ka lundulula omilandu ndhoka dhi li po ngashiingeyi oshoka itadhi kwathele aaniilonga.
“Otatu ka kondjela uuthemba wAanamibia mboka taya monithwa iihuna komahangano taga ningi oongeshefa moNamibia. Ehangano tali gandja oshimaliwa shoomiliona N$1,5 koSWAPO opo yi ninge omahwahwameko ashike olya nyengwa okufuta aaniilonga yalyo mboka haye li etele po oshimaliwa shoka oondjambi dhi li pamuthika,” Kambonde ta ti.
Oompito dhiilonga
Muuyelele womwaalu gwAanamibia mboka kaaye na iilonga gu li pombanda noonkondo, ADM okwa ti oku na omathaneko ga yela nkele ta ka eta po oompito odhindji dhiilonga.
Anuwa ota ka tula aanyasha ponomola yotango oshoka oyo ya ninga po omwaalu ogundji gwAanamibia mboka kaaye na iilonga. ADM okwa ti ethaneko limwe lyomomathaneko gawo gokweeta po oompito odhindji dhiilonga okutula okapangelo kehe posikola moshilongo opo a kuthe aanyasha mboka ya ilongela uupangi momapandaanda.
Anuwa shika ita shi ka eta po owala oompito odhindji dhiilonga ashike otashi ka kwathela unene ngele tashi ya kokufala omayakulo gopaunamiti popepi noshigwana.
Kambonde okwa ti etompelo limwe aalongwantu oyendji kaa ye na iilonga omolwaashoka iilonga ohayi pula ontseyo yoomvula odhindji unene, ta ti ongundu yawo otayi ka shunitha pevi oomvula dhontseyo ndhoka hadhi pulwa kaagandji yiilonga moshilongo. Kombinga yaanyasha mboka opo ya mana omailongo gawo kiiputudhilo, anuwa otaya ka pewa iilonga shi ikolelela koonzapo dhawo ihe hakoomvula dhontseyo.
“Omuntu opo a mana eilongo koshiputudhilo shopombanda oto mu pula ontseyo yoomvula ntano te yi adha peni? Omuntu ngono ita mono iilonga ngele otayi pula oomvula odhindji dhontseyo. Aanyasha mboka opo ya mono oonzapo dhawo dhawo itaya ka pulwa ontseyo yasha,” osho Kambonde a tsikile.
Uunamiti negameno
Anuwa ADM ota ka kwashilipaleka kutya iipangelo yepangelo aluhe oyi na omiti dha gwana oshoka omiti odhi na ondilo, aantu oyendji itaya vulu okwiilandela omiti.
Anuwa ongundu ndjoka oya thaneka okutula uupangelo poosikola moshilongo unene tuu poosikola dhomomikunda oshoka omayakulo gopaunamiti oge li unene kokule naantu oyendji kiitopolwa yokomikunda.
Openzela
Ongundu yo-ADM oya ti Namibia oku na uuyamba owundji ngaashi okawe nongopolo noya hala aakwashigwana ayehe ya tyapule uuwanawa woshilongo shawo, onkene oya uvaneke kutya ngele oya mono iititatu iyali (2/3) momahogololo otayi ka tula miilonga openzela yAanamibia ayehe mboka kaaye na iilonga opo ya kale haya kwata oshimaliwa N$500 kehe komwedhi ya ikwathele moompumwe dhawo dha yooloka.
Anuwa ADM ota ka gwedhela openzela yaakulupe naantu ye na uulema noshimaliwa N$400 , ya kale haya kwata N$2 000.