Mariental- Komisare gosirongo saMalaysia, kumwe neruganeno nevango lyovanadorongo kupitira mombunga ezi vana ktumbura asi Malaysian Technical Cooperation Programme (MTCP) alumni moNmaibia, kavatulire paveta projeka zokuweka nonhunhwa pevango lyovanadorongo moune una puko. 

Projeka ezi kuna kara asi tazigava yiviyauka yoyinzi omu vana dorongo navalihameseramo, ntani yirugana yokulironga kuruganesa komawoko. 

‘’ Ose kuna kugava yimaliwa yokutulisapo matungo omu navaweka yinhunhwa yokusika ko 200,’’ yimo ana kutanta mukwatelimo mukurona karelipo sirongo saMalaysia moNamibia Dato’ Ndokotora Mohamad Rameez Yhaya, apa nye kazimupuragerere ruha rwa Nampa. Mukuronagona gevango lyovanadorongo Sam Shaalulange, kayinkondopekere asi eyi asi mulyo unene kukara noprojeka zangesi posiruwo oso kageve etambwiromo vagenda. 

‘’ Eli elikwamo vanatulisapo nalininkisa vanadorongo vakare noyiviyauka yomutaro. Awo navakakara nye noudivi nsene asi vana kapwaga modorongo vakalihamesere monkarapamwe, ntani projeka ezi ngazigava nye nyama zonhunhwa ntani mauta, age ngavavhura vantu kulya, yipo yiretesepo vantu vahare kulya,’’ yimo ngoso ana kutanta. Shali Kapepo, presidente gwa MTCP alumni moNamibia, kapandwire varugani wokoHaradap kevango lyovanadorongo mukaro ogu kavaruganesere vatambure uhwi ou.  ‘’Egano lyangesi kapi lina kara asi kuwapayika tupu eparu lyavene, nye kuna kara asi simpe navavapa hena udivi wokuweka nonhunhwa ndi kuninka una farama woyinhunhwa, eyi yina kara asi mulyo unene mukukara nye eparu lina wapa,’’ yimo ana kutanta Kapepo.  –Nampa