Mburu-uru –Paulus Haingura, foromani gwaMburu-uru mukunda gwakara moKavango zoutokero, kahundilire epangero asi liwapukurure nokugwederera nonkondwa rongero domomukunda, edi dina kara asi mukaro gwado ngesi nokutarakosi, ntani kapi vadiwapukurura rumwe nonkondwarongero edi kutunda tupu mo mvhura 1972, nampili ngomu yakara asi womukunda nare vaturamo mahundiro gangesi.
‘’ Ose eyi tuna hara epangero lyahepa kutura sure zetu ezi pelikwamo lyokuziwapukurura’’.
Ose tuna diva asi epangero kwakara noyinka yokulisiga siga eyi yin a pumbwa yimaliwa, nye nose kuna hara kukara pelikwamo lina lyonoprojeka depangero.
Ezi sure ezi kwazitarerera unene, nosure dimwe edi vadikire siruwo seesi nare dagwana ewapukururo, foromani yimo ngoso ana kuhuyunga konyima tupu apa kavagwene uhwi ndi mbatero zokuyavatulirapo evango lyokurara vanona lyokukwateramo kavageve wokampani zokukwata nomfi zaNetagea Investment PTY Ltd.
Evango eli lyokukwateramo kalipulire yimaliwa yokusika ko N$42 000 eli varugana asi livatere vanona vana kara noudigu womararo ava dimbire posure ozo, makura awo kuruganesa nonzugo dopampo edi dina kara ngesi asi dokurara varongwa. Foromani katente asi epangero lyahepa kukona kona masivano govantu, ngovanona womoNamibia vahepa kukara vana lirongo ntani ukangi wahepa kukarapo, kapisi omu zina kara nye ngesi ezi sure zetu ezi, vanona kuna kuremana koyo yina kugwana kosure ezi, ntani makende gatavauka. Kapi nye tava tusigilire morwa epangero kuna kara noyinka yimwe nayo yomulyo, unene monoprojeka. Sure ezi kapi zamona rumwe ewapukururo kutunda tupu apa vazidika ngesi nomvhura 52 dina kukapitapo.
Eyi kuna kumoneka asi ezuva limwe etungo eli naligwira vanona,’’ yimo ana kutanta ngoso. Vantu navenye vatunga pomukunda hawe mambo gawo gokutunga nowayi.
Ano posure ngesi kuna karapo tupu nonkondwa mbali dekuma edi dokuhupako hawe dowayi. Sure ngesi kuna kara novanona wokusika ko 153, ava nye avatundu monomukunda dakundurukida sure ezi. Vamitili vetu kapi vana kuvhura kuronga ndi kugava erongo lyokuwapera morwa nonkondwa rogero odo dowayi. Ano edi nye nonzugo vanayaturapo kuna kara nye asi nsene upyu unene nokudiruganesasi ano nsene mufu hena unene napo udigu hena, eyi yina kara asi nsene upyu nonkango ano nsene mufu napo hena ngoso kwawo.
Sure ezi kwakara nye novanona womonomukunda ngwendi Nyondo, Nkambe, Sava, Nkuyumuko, Calikao ntani MurerenaNkandi ngoso, sure kwakarapo nontambo ndunge zozimwe ntani dogoro ntazimwe.
Sure kwazidika kwaliyuka nomberewa zomukunda horowero gwaTondoro, mberewa zaKansela Joseph Sikongo Sivaku, ogu gakara hena asi yige muna sipundi gondango zoukansela moKavango zoutokero omu yina kara hena asi ruha rwerongo kwakara moomo megendeso lyawo. –jmuyamba@nepc.com.na