RUNDU – Mueteleli wa Khuta ya sizo ya Shambyu Hompa Sofia Mundjembwe Kanyetu ususuelelize maticele kushenga baituti kuba bayahi sakata banaha. Naize haiba likolo inge litukufalelwa hala lituto za Bibele, banana bakasaba Mulimu, kakueza cwalo baka kuteka babahulu ni mulalo. Hompa naize mwamazazi acwale, banana nibona baseba ipumananga mwakhuta yahae, kakutisa butata mwahala sicaba, mi taba yeo haimutabisi.

Nabulezi zeo kwamulalelo wacwalecwale kwamunzi wa Kayengona kamulelo wakufumana masheleñi akuyahisa muyaho wamakopanelo wasikolo sa Faustinus Haididira. Sikolo nesi kolekile masheleñi alikana N$160 000, nesifumani hape puli ni komu. “Maticele, lusike lwaba ni buzwa hakutaha kwakuluta banabaluna mwalikolo. Nibulela cwalo bakeñisa kuli hane luhula, nelulutwa lituto za Bibele kuli lusabe Mulimu. Kuzwelela haniba Hompa, mwakhuta ya luna ya sizo, viki ni viki, lubona banana babasakena sikolo, kuzwelela mwalikolo zamina,” nabulezi.

“Banana basweli kukataza, kacwalo na mi eleza, maticele, kususueza banabaluna kusaba Mulimu ni bashemi babona,” nabulezi.  Hompa nabulelezi maticele kuli kupila hande ni kuba ni musbezi hakutoloki kuli batuhelele banana ba. “Mubalute kuli nibona babe batu babande, batu sakata mwahala sicaba saluna. Muba bulelele mwamakilasi kuli ni mina nemusina sesiñwi, mi kachenu semuli famayemo ao. Mukabona kuli bababeli kapa babalalu bakakala ku utwisisa butali ni zibo, mi baka kumalela kwasikolo, ni kuambuka mikwa ni likezo zemaswe,” nabulezi. Kwamukopano oswana mubakweli ngambela wanaha John Mutorwa niyena nabile ni manzwi akubulela kwa maticele, bashemi ni baituti. “Banana ba bazwa mwalibaka zeshelashelana – mi musebezi wamina, kakuba bashemi, haufeli hamufeza kuñolisa mwana’ mina. Musebezi wamina kikulatelela ze ezahala kwasikolo. Minyako haikwali,” nabulezi. “Muye kwalikolo kuyo buza mwaezeza mwana’ mina. Hompa ulutaluselize kuli banana batezi mwa khuta, kacwalo musebezi wabashemi kikulatelela nikuziba zeba eza banabamina. Haiba baeza hande maticele baka mi taluseza cwalo,” nekubulezi Mutorwa. Naize musebezi wamaticele sihulu bale babatiselize haki obunolo, kacwalo baswanela kusebeza hamoho ni bashemi. Naize maticele bakatana ni banana babazwa mwamapala ashelashelana, babana ni mayemo ashutana kacwalo batokwa lituso za bashemi. Naize kuli banana baikole hande tukelo yabona yakuituta baswanela kuteeleza ni kukuteka maticele.