MAPUTAS – Swapos disekretares xenerals, Sophia Shaningwas ge !Hūb di ǁûb, Nangolo Mbumbab tsî !hū!nāsi ǁhōn di ministeri, Albert Kawanab hâkha gere ǂgan, !hūǁîo a ǂkhanin ose Maputas ǁanǂgāsaben hîa Bwatabwata !Hū!nāsi ǀGuru!hanab, Mukwe ǁhûi!nâǂharis, Kavangob Aiǂoas ǀkharib dis !nâ ǁan hâna hui!khoe. Kaidisidi !nâ hâ ǁanǂgāsaben !hūǁîsis ǁgauǁgausen ǂkhanina ūhâ tama amaga. 

“ǀGuis khami i ǀkhurub huib,ǂkhanub ra ǁkhâkorobe mā marisihuib, tamas ka i o Harambesa xu ra hā !gâi!gân tsîna xun ge a domdore ǁoa. ǁKhātin ge !goaxa ǁhûidi !nâs tsîna am!nâxa ǁkhā tide. Tita ra ǂan ǂgaos ge, mâǁaen ǁnā ǂkhanina nēpa ra hāsa. Sida ge SGsa xu !ereamsa ra hō ǂgao. 

Nē ǁanǂgāsaben di ǁgûn ge nēpa xu torob ǀkha ge saruǂuihe, tsî ǁkhawan ge !hari-ais ai a oaǀkhī, o !hūǁî tamase ra mûhe. 

Nēn ge a !hūǁî,” tib ge Mukwes !âb Swapo !nans ǀkharisi !khōdana-aob, Kristian Kalyangu Murikiba, ǁnāpa ge ai!â gere ǂoa Satertaxtsēs ai hâ i ǂnûs  tawa ge mî. 

“!Hūb di ǁûts, Nangolo Mbumbatse tsî Albert Kawanats, ministerts !hū!nāsi ǁhōn ditse, nētsē ta ge Maputa ti ra ǀonǂgaihe !garo!āsa sari hâ,” tis ge Swapo !nans sekretares xeneralsa ge mî. Shaningwas ge ge mî, !nae!khaidi ǁga da kara kō-oa, on ge nē khoena Suid Afrikab ǂhanub xa ǁgaris !naka nē !â!âb toro!khamdi ī!khaib ase ge !gara!āhes khao!gâ, nēpa xu Angolab, Zambiab tsî Botswanab !hūǀgoradi ǀgūse ge ǁan. Xawen ge !hūb !noras khao!gâ ge oahā tsîn ge !haokhoen ase a ûi-ūhe ǁoa.” !Hūb di ǁûtse, nēpa ta nē khoen ǀkha mâ !khaisa ta ge ra ǂan kai tsîn !nāsa ǀammi âna ǀguis khami ī !hūǁîsis di ǂkhani-i tsîna ūhâ tama hâsa,” tis ge gere mî. 

“Sada ge Namibiaba ra ǂgaeǂgui tsî da ge ge ǁawoǁawo nē !garo!ās di ǁanǂgāsaben nî !anu āǁgam-e ūhâ, skolgu, klinikdi tsî ǀawa!namn di beros tsîna !khaisa, xawe da ge nau ǀkhāb ai !hūǁîsis di ǂan!gâsa mā nî tama hâ. 

Nēs !nâ da ge aitsama ra mâ!oasen, !hūb di ǁûtse tsîb ge ǁnā-amaga ǂhâsiba hâ minister Kawanab nî ǁîb sîsenaona nēǀî sîǀkhī, nē khoen nî !oabade māhega !khaisa. Nēn ge sada Namibiab !hūǁîna,” tis ge Shaningwasa ge mî.