ǀGANIKOBES – ǂKhari ǀhûhâsib ǀGanikobes, ǀawas-huriǂoas ǂNūǂgoaes dis !nâ ǁgoe !garo!ās dib ge ai!â gere ǂoa wekheb di Fraitaxtsēs ai kaise ge !huri, ai!âkam tsēs ai ge ǀgūse mâ ǁgam-ams tawa ǀasase a ǂgāhe ǁgam-i paigu tsî sores ǀgammi ǀkha ra sîsen panelgu tsîn !goeǁaeb !nâ !nariǁnâhe hâ hîan ge a ǂkhai o. 

New Erab ǂhôare-ao-i xab ge dî!nâǁgamǁaresa ū-ūhe hâ i soab !nâb ge 61 kurixa Andreas Goliatha, kaiseb nē !nae!khais xa !gamse tsâǀkhāhe hâ !khaisa mî tsî ǁnā !nari-aon ǁîn di ǀhûhâsib khoena ǁgam-e ūhâsa go ǀhanasa, ǁgam-i mâsib ǀkhan gaxuse !gomma gere tsâs khao!gâ. 

“Sida ge kaise ge !gâiaǂgao, Direktorats !Garo!ā ǁGamāms dis ge tsauban ge a khaotoas khao!gâ, tendersa a māǂui nēpa a ǂhâbasa xun nî ǂgāhe tsîda sida ǁgam-e nî ūhâga, !nāsase da ǀgūse ǁgoe ǁkhaeb tamas ka i o ǁAub hîa ǁnāpa-ū hā ra !kharuba xu ǀgui ǁgam-e gere hō amaga. 

Xawes ge nē !narib !nae!khaisa sida dâba go ǁara,” tib ge ge mî. Giathi ge ai!â ge mî “ ǂGuida âda hîa ûitsamaxūna xu ǀgui ra ûida ge ǀkhurub mâsigu !nâ ǀuniga hâ ûitsamaxūna ge ǂoa!nâ tsî da ge ǁnā ǂgom!gâb nēsi da ǁnâi ǁkhawa ǀāxū-ammese, ǁgam-e da go hō o, ǁkhawa nî ǂgaritsoatsoas di  go !khom!nâhe”. 

ǁÎb gere ǁgui!ās ge, nē ǀhûhâsib hoaǁaeba !Garo!ā ǁGammās departements ra hā-ū ǁgam-e xu ǀgui ûihâsa. ǀNî ǁaega ra hās ge nē kai autogu tsēde !onkhaohâses tsîna ǁgamna ra hā-ūsa. 

!Autsawises di ǂgiǂgosi ǀawemā-aob, Jeremias Goeiemani, ǁîb ǀGanikobes !ereams tsîna tani hâb ge, nē ǂhôaǂkhanib gere dî!nâ bi soab ai ge mî, ǁgamam pompdi tsî sores ǀgammi di panelgu di !narib go nē !â!âb ai ǁnaetib ase a īsa.

“Nē !nae!khaisa ta ge go ǂanǂanhe, xawe ta ge ai!ân tarena nî īs xa noxopa a ǀū,” tib ge ge mî. ǂGiǂgosi mâisab ge ge mî, nē !nôa !nae!khaidi ai!gûsa ra !hâumâi tsî ǂhanuba marisi -âib !naka ra mâisa, ǀhûhâsib khoen ǀgaisase ǁgam-e ūhâ tama is !gomsigu !naka !gomma ra tsâ xuyi-ao. 

“Tita nî aoǁgui !khais ge îs ga ministerisa ǀkhamasa ǁkhaubas ǀgauga ǁgamamdi tawa a sī-ūsa, nē !nae!khaidi hîa ǀhûhâsiga omkhâisa ra !khom!nâde ǁkhaes ase,” tib ge Goeiemana ge mî. 

ǁNāpab ge nē !nae!khais ǂnamipe nî xū-e mîse a ǀgūǀkhāhe soab aib ge ǁKharas !Garo!ā ǁGammās departements danab, Carlo Cloeteba ge mî, nē projeks ge noxopa ǀhûhâsiba kontrakteri xa ǁkhaeǁnâhe tama hâ i hîas ge nē !nae!khaisa a īsa. 

“Nēs ra ǂâibasens ge hoa sîsenni ge noxopa kontrakteri !ereams !naka hâ i !khaisa, ministeris ose,” tib ge gere ǁgui!ā, Cloeteb ge mîsa !oab ge kontraktera !naris ǁhōba ǀawa!namn tawa ge ǁkhowa-am tsî di ge ǀawa!namn di ôa!nâde ai!gûgaru.