Otjimariva tjozohahende tjokuvatera ovaungure novaporise votjiwaṋa mbe hungamwa omatokero pekepeke woveta moviungura vyao vyokutjurura ourunga wovinamuinyo oomatokero omanenene nga hungama ombwiko yoCommunity Against Stock Theft Organisation, ousupi OCASO.

Omburo yayo aiyerike nai o-N$30-00 motjiuru tjongombe ndja randa. Ngunda otjimariva tjohahende motjiposa atjihe meyuva airi o-N$15,000-00. Tji tji topora ondjaṱu yOCASO tjinene nu wina tji tji ha yandja osuvaneno kombwiko yayo naṋi i kure nu i vaze kovitjitwa vyayo vyarwe vyokutjevera ourunga. Tji tjihepa  kutja ovaporise vayo ave ha rara kaparukaze nungwari ve kare kangi no ku kara pu kangamwa oruveze aruhe mo zo resevate za Pukiro na Eiseba. 

Muzo omarunga mu ye ri omapyuke omutenya nouṱuku ozoiri o 24 meyuva, omayuva hambombari motjiveke. 

Munao OCASO opu mai rihekenene kozongetjefa za Pukiro na Eiseba, na kuarue po siya mbetumbira muzo,  okuriyaruka mozondjaṱu zazo okutara kutja maze vatere vi otjiungura OCASO tji ya vereka okuvatera ovaṱuta okungara mave yeta omboṱu tjinga nambano mOCASO ave nomutjevere ngu ha rara. 

Pendje notjimariva tjozohahende pe notjovitoore tjovaporise okuvaza kotjombanguriro na wina tjawo tjokurya.  Ngunda ovitjitwa vyarwe vyOCASO, imbyo ondimwa yayo, okutjevera ourunga ouṱuku nomutenya, avya tundama indi avya tundamene. Ovyo wina mbi hepa oviungurisiwa pekepeke tjimuna ovitoore kutja ovyokupaṱorora poo ovyokutuka ohakahana ku va munu ondaze kutja omarunga maye nyinganyinga. Nandarire oruveze pu va sokuza tjimuna omberoo OCASO kai nayo. Okutetera ovihepwa OCASO nai mbi hi na vyo. Omeho wayo nai pu ya hwiririkire mozonganda zovirandisiwa noviungura okuyaruka mozondjaṱu zazo kutja maze yenene okukamburira pi motuhepo otuwondja twOCASO.