Ozombara zOvaherero nOvambanderu za yarukapo rukwao oku nakaura Onḓuvasaneno yApamwe, ndji tjiukwa otjOjoint Declaration, ousupi OJD.
Erero tji za raerere Otjiuru Tjehi, Omutjuṋikwa Nangolo Mbumba, nao kehi yehika razo ra Kandjoze tji za hakayenene naye. Morutuu rongurameno yazo oyo nÿu za resere ku Mbumba, okuza no ku paturura nondangu kokutja wa itavererere okuhakayena nazo, kazawombere okuraisa omuiihamwatima wazo kutja katjikando otjitenga owo okuhakayena na ye, nu ovikando ovingi mbi va hakayena naye naze raisa ku ye imbi mbi ze zera, ovyo vya kayanda monyee.
Monao otji ze mu raere kokutja ohoromende kai ve twara kotjiuru. Tjimuna tji za raisa onyengo yazo nOJD nokuiinakaura posi ya ngamba ohoromende nEhi rOvandoitji ndji ze kayenda nayo komurungu. Ze mu pe ondunge yokutuvira otjihungiriro tjOtjiṱiro Otjindjandja omuano warwe nu koupe wo ku hino kupatera karive pendje nozondekurona momahi wozonganda. Nondunge yombongarero yozondekurona azehe rutenga otja kombepo yo 2006 yOmbongarero yOtjiwaṋa.
Ozombara ma ze tja omatyasaneno wohoromende nazo mOrupare rOzombara, Chiefs Forum, otjiwova nonÿukwahere kaparukaze. Nandarire kutja ozombara za haṋika nozongwao zarwe nohoromende, ze pupunyunwa uriri ayo za i kumwe na wina kutja ohoromende nga i kayende komurungu nOJD. Tjimuna otja tji pa kara nOmbongarero yOrupare rOzombara yo 2022. Munao otji maze munu kutja kape tji nohepero owo okuhaama motjipare ihi.
Tjingetjo ozombara maze munu kokutja otjihungiriro tjOtjiṱiro Otjindjandja tja tjirira kaparukaze. No ku ungurirwa kutja oruveze ndwi okutona mu ndja nu. Nandarire imbwi ouye nambano awa tara kwarwe tjimuna Oruwano rwa Afrika.
Oro nai ombura ndji mai yende ndwa tanda kutja oyOtjiṱiro Otjindandja nOtjisuta. Indji nambano ondji ri ondjira ndja sere okuvyavyanga. Okuiisira kOsouth Afrika oyo nai ndji toka Oisiraera mOtjombanguriro tjOuye Tjoukohoke mena rondjito yaro yOtjiṱiro Otjindjandja mOgaza. Okuhorera kOsouth Afrika ndja nanena Oisiraera kotjombanguriro itji na wina katjisupi Onicaraqua yotjiposa tji tja puratenenwe otjivike hi.