Ombura ndji mai yende Oruuano rwa Afrika rwa kwizike kutja maru yandja ombango yaro kOtjiṱiro Otjindjandja.  Munao ozondekurona otji ze hi nokuhepa okuye ku ṋangwa aza haama pehi orondu maze sokusekama okuuta okurokoha nondoro nokukongora omivero avihe mbi maze sokukongora. 

Kutja ombango nonḓengu yazo motjisuta i honapare.  Kazeire Raurau, imwe yozondekurona nḓeri momahi wozonganda tjimuna Otjauana na South Afrika ma tja.  Eye wa kuramenenepo ozondekurona zOvaherero, Ovambanderu nOvakwena za Tjauana mOtjozondjii omayuva wokambo konḓiro ozondekurona tji za tezere ozondambo zovaṱi novakuru vazo, tjinene imba mba hangaurirwe i yorumbo rohangauti nondatumisire indwi Katjombonḓi, rumwe rwao ndwari mOtjizondjii oruveze rohuurire yEhi rOvandoitjiti ndja twara kOtjiṱiro Otjindjandja tjOvahererro nOvakwena. 

Raurau wa kuramenenepo orutu ousupi ndu maru tjiukwa kutja OBOSNOO, OBotswana Society of Nama, Ovaherero and Ovambanderu  , nduri orutu rovakwatera va Tjauana mba zirire mOvaherero, Ovambanderu nOvakwena mba zirire mOnamibia nave taurisiwa ovita kOtjauana. Oro ndwe ritwa momuhunga okukongorera mbi kayenda mOnamibia tjinene ovitjitwa ongondoroka nomakuruhungi wOtjiṱiro Otjindjandja. Raurau opu ma tjere owo tjinene ve undja nokupuratena kovakwao mOnamibia owo nai mberi mondimwa nohonga yotjiposa hi tjotjihungiriro nai tji tji kayenda pokati kohoromende ya Namibia nongwao yEhi rOvandoitji owo otjovature novakwatera va Tjauana mu ve hi norupa mu va paterwa pendje nandarire kutja wina ve norupe orunene tjinene nOtjiṱiro Otjindjandja. “Ete twa tupuka twa ya ngo nu tu i ihamua tjinene nu tu undjirwa po kutja nandaku oweṋe mbu mu tu hohiza. Nandaku oweṋe mbu mu notjihorera.  Posi ya eṋe oveni nambano oweṋe mbu mwe ku kurira ovazeu [ovavi] kombanda yetu ohunga noviṋa mbi mu tjita.  Tjazumba mu kondja okutuhaṋa kokutja ngwina karive owandje imba vorive ovandje.” Na tja otjiungura tja uta okunyanderwa ayoo otjiungura tjovandu kuwo oveni nu ovandu va pandjarisa ouwe wotjiposa hi. 

Otji ma ningire kutja ngunda avihe kavi ya pandjara ondjira okomurungu okukondjisa okukotora otjiṋa hi pu tjiri. “Tu tjiwe kutja katjetu tu kongorere otjiṋa tji nouwe, nomazenge otjovahindwa.”