Omuhongifikola e li moshipundi shopendjela Asser Mukumangeni okwa yambidida oshipangelo shaKongo noshoyo oshitaashi shopolifi noikulya.
Oikulya otai ka pewa ovanaudu ve li moshipangelo noshoyo ovadalongo.
Oikulya ei, oikunomwa ya dja moshitukunino shaye shi li mOkongo.
Pefimbo ta yandje oikulya oshivike sha dja ko Mukumangeni okwa ti ota lalakanene okushakeneka epangelo ondjilakati tashi pitile mokuyandja okuilya. Okwa popya ta ti neudo okwe likola mo shihapu moshikunino shaye.
Naashi osha eta opo a yambidide oshipangelo noshitaashi shopolifi.
“Onda didilika ovanaudu va pumbwa oitungifilutu. Osha fimana ngeenge omunaudu ta li oitungifilutu,” ta ti.
Mukumangeni okwa ti ota twikile okuyambidida ovanaudu noikulya tai di moshikunino shaye.
“Oikunino younamapya oya fimana shaashi otai lwifa ondjala noluhepo,” ta ti.
Kansela woshikandjohoololo shaKongo Efraima Shipindo okwa ti Mukumangeni ota ulike efano liwa moshiwana.
Okwa ti okuyambidida kwa ye ota kuxwaxwameke ovanhu ta tote po oikunino yavo. “Ngeno Mukumangeni ka kwa li e na oshikunino ngeno ina yambidida oshiwana. Oikunino younamapya oya fimana,” ta ti.