ELIM - Aakulupe yamwe otaya nyenyeta ya themenenenwa po komaupyakadhi momagumbo sho yamwe yomaanona yawo ye li koondoolopa nokomaushimba itaye ya yambidhidha, omanga ye ya thigila omaluvalo gawo.
Silka Johannes gwomomukunda Iihanguti moshitopolwa shaMusati okwa ti okamaliwa ke hoka ha mono kopenzela oka kondekwa kaatekulu, oku ya gwanithala oompumbwe dhaatekulu ye oshowo dhomegumbo.
“Nuumvo onda li nda pululitha ashike owili yimwe, nonando ehalo olya li okupululitha oowili ndatu opo ndi ka vule okumona iipalutha ya gwanena aanegumbo yandje, ihe inashi kwatha sha, iilya oya si po komutenya,” ta popi ngaaka.
Ta ti ye okun a aatekulu yahetatu megumbo ihe aakuluntu yaanona mboka kape na ngoka ha ti tambula omboloto, nonando yu uvite omapya inaaga za sha omimvo adhihe ndhoka dha piti.
Johannes okwa ti, nonando aanona yamwe y muyo ohaya mono oshikwiila shaanona ye li mluhepo, iinakugwanithwa oyindji e li oye awike.
“Aanona yetu oye tu thigila omaluvalo ya ya muushimba, ihe kOwambo huka ihaye ya ko yo itaya yambidhidha omaluvalo gawo. Otatu mono iihuna, otwa kulupa paife,” Johannes ta nyenyeta ngaaka.
Ta ti, oyana yamwe ihaya dhenge nongodhi ya pule oyana nkene ye li po, uudhigu awuhe owu li ashike komapepe ge.
Oshikundaneki shika osha li sha yi natango moonkundathana naanafaalama yamwepo mboka nayo ya gumu kuupyakadhi wa taalela aakulupe momagumbo.
Loini Simon okwa tumbula kutya aanyasha aakwawo oya ethela po aakulupe unene, ta ti, aanona mboka ohaya kwata ashike N$250 komwedhi, ihe haayehe haya mono oshimaliwa shoka. “Yamwe otaya popi kutya itaya kwathele aanona yawo oshoka ohaya mono oshimaliwa shokomwedhi, oshike ihaya ile po aanona yawo, ya kale taya taamba oshimaliwa shoka yo ya mone ngele oshipu okuhupa omwedhi aguhe noshimaliwa shoka?’’ Ta pula ngaaka.
Ta ti, ethimbo limwe aanona oya pumbwa ashike ohole yaakuluntu yawo, ihe itaye yi mono oshoka aakuluntu yawo ihaye y ako komagumbo.
Ta gwedha po kutya aanona oya pumbwa natango omapukululo, aakulupe mboka ye li nayo momagumbo itaya vulu we.
“Yamwe kaye li koondoolopa dhokokule, ihe oya nyengwa ashike okukutha esiku limwe okutalela po aanona yawo,’’ ta nyenyeta ngaaka.
Shekunangela Shivolo ngoka a li ta kongolola iimuna ye esiku ndyoka, okwa ti onkalo ndjoka oya gwilila po aakulupe, onkene aavali yaanona naya lundulule.
“Yamwe ohaya zi koondolopa taye ya okwiindila aakulupe oshimaliwa, omanga aakulupe ya kalelwa kaanona yawo, oshi ivule peni itaya zi ko koondoolopa ye ye ya kalele aavali yawo, ngele itaya vulu ko?”
Ta pula ngaaka.
-vkaapanda@nepc.com.na