Paulina Ndalikokule
ONGWEDIVA – Aakalimo yomondoolopa yaNgwediva oya pewa uule womvula opo ya fute oondjo dhawo kaape na iihohela ya gwedhwa ko. Aangwediva oyendji anuwa oya ndopa okufuta omayakulo gamuni noondjo dhawo odha londa sigo opoomiliona N$70.
Mayola gwaNgwediva Taarah Shalyefu moonkundathana naKundana okwa ti elelo lyondoolopa olya tokola okukutha ko iihohela koongunga opo aakalimo ya vule okufuta nokutameka omapandja omape.
“Aakalimo naya longithe ompito ndjika nokusimaneka oku futa omayakulo gamuni opo a vule oku tsikila no kugandja omayakulo ngoka osho woo okuhumitha komeho aakalimo nondoolopa,” Shalyefu a ti ngaaka.
Shalyefu okwa ti aantu aakalimo oyendji oya kala nokunyengwa okufuta unene tuu okuza pethimbo lyocovid-19 sho aantu ya kala momagumbo taya longitha omayakulo gamuni ogendji unene tuu omeya oshali. Yamwe oya li ya kanitha iiyemo.
Aakwashigwana otaya vulu oku ka tameka okufuta okuza mo1 Juli nuuvo sigo 30 June 2025.
Omalelo ogendji goondoolopa moshilongo oga gandja edhimepo lyiihohela okuza omumvo gwa zi ko. Ongwediva nayo ngashiingeyi oya waimina oondoolopa oonkwawo.
Elelo lyondoopolopa yaNdangwa lya li olya gandja uule vomvula kaakwashigwana yawo okufuta oomiliona dha dhika po N$85 okuza muKotomba 2023 sigo Septemba 2024. Aakalimo yomoshakati yomOshakati oya li ya pewa oomwedhi omulongo – esilohenda ndyoka lyokufuta oondjo dhomiliona N$80,2 pwaa na iihohela lya tameke muSepetemba omumvo gwa za ko otali hulu omwedhi nguka. KOmuthiya nako aakwashikwana yako oya pewelwe oomwedhi hamano okuza Desemba 2023 sigo June 2024 ya fute oondjo dhoomiliona N$32,7.
Shalyefu okwa ti otaya ka yambula po wo omatala gwaNgwediva, aakalimo mboka ye na omahangano taga vulu oku ninga omayambulepo ngoka ota ya indilwa ya tule mo omayindilo gawo koteendela ndjoka. -ndalikokulep@gmail.com