OSHAKATI - Opolifi moshitukulwa shaShana otai indile moshiwana kwaau ta ka mona omulumenhu e na oivadi yomayoo komatwi a lopotele opolifi i li popi naye.

Otaku hokololwa ookalyamupombo vavali va dengwa nokulumatwa pefimbo kwa li tava kendabala okunyeka omushamane nomukulukadi waye omaliko avo.

Oshiningwanima osha ningwa onghela mOshakati efimbo lokeengulasha.

Omupopiliko wopolifi moshitukulwa shaShana Thomas Aiyambo okwa hokolola ta ti omushamane nomukainhu waye ova ponokelwa kovalumenhu vavali pefimbo kwa li tava di koshipangelo shaShakati.

Ovaholafani ava okwa li va twala okaana kavo koshipangelo, oko ka li ka humbatwa kuina.

Vati ohaluka ashike eshi va ponokelwa kookalyamupombo, tava lwifa omushamane vati ne va pe eengodi davo dopeka noimaliwa.

Omushamane vati okwe shi pondola okudenga ombudi imwe neengonyo moshipala ye ta lumata po umwe komatwi.

Efimbo olo omukulukadi vati okwa kala e lipyakidila ta kuu, fiyo ovanhu pomudingonoko tava penduka nukuuya va vatele omusamane. 

Nakulumatwa okwa faduka po noipute komatwi, ashike nakudengwa ongonyo okwa kwatwa kovakwashiwana ovo va ufana opolifi. 

Oshiwana osha kumaidwa opo shi kotoke ngeenge tashi ende oufiku molwaashi ookalyamupombo ova ninga vahapu.

Moshiningwanima shikwao, opolifi moshitukulwa shaHangwena otai indile moshiwana kwaau e na ouyelele kombinga yomushingi wotuwa vati a lyata nokumonifa oshiponga omulumenhu weedula 19 ndele ta faduka po.

Oshiningwanima osha ningwa Etivali kokumunda Omalyata poukamba Oshihedi efimbo loufiku.

Otaku hokololwa kutya omumati ou a twalwa koshipangelo shaNgela ashike oku li monghalo i li xwepo.

-fhamalwa@nepc.com.na