Lasarus Hakwaake

Eenhana  – ovakalimo vomOhangwena ova kala nefimbo lile tava konghola keembelewa doku adjaneka omeva komikunda opo va ninge omaindilo eevili domeva opaumwene. Nonande oshiwana sha kala she li longekida osha shina etimaumbwile eli kutya fiku limwe onava ka pewe omhito ei. Eedula mbali da pita alushe ova kala noku lombwelwa kutya ka pena oshimaliwa shoku landa evili nonande ovakwashiwana vovene ovo hava landeko eevili odo kombelewa yomeva.

Odula ei petameko Ombelewa yoku adjaneka omeva okwa li ya shivifila oshiwana kutya opa etwa omukalo mupe woku yandja omeva opaumwene opo omunhu taka pulwa a lande evili yaye yomeva. Apa oshiwana okwa li shi udite kutya eembwa da kwata odavo, nenota ovena oku li mona kombuda.

Efiku loku ninga omaindilo omeva osho la fiki noshiwana okwa li she uya momangungo efike pedu, eshi sha eta onghalo ya nyika oshiponga. Omukulunhu wombelewa yoku adjaneka omeva Lazarus Shikololo okwa ninga eeghendabala a popye nembako a udifeko ngeno oshiwana ndele inashi kwafa sha. 

Onghalo oya ka nyaya nee komunhu ha keonga vali nosha eta ovanhu vamwe konyala va monenepo oiponga nokuli. Shikololo okwa popya kutya omolwa onghalo ei oshe va fininika opo va kaleke manga omaindilo omeva osho sha eta ovakwashiwana va lye meenyandi noku mona kutya ovakengelelwa kombelewa nova hepifa oimaliwa yavo shaashi vahapu vomuvo okwa li va onga onhanda nokuli oku penduka oufiku woku ninga omaindilo.

Omupopiliko woshiwana mOhangwena Silas Panduleni Nepembe, okwa ti okwali pa ningwa omutumba womongholongholo omo mwa tokolwa opo oshiwana shi kale sha pewa ombili, onghee ota yandje ombili unene koshiwana omolwa ashishe eshi sha ningwapo. 

Okwa udaneka kutya omaindilo omeva ota ka tameka vali okudja momafiku 23 April 2019. Okwati ovaindili vomeva ova teelelwa vaka ninge omaindilo omeva keembelewa doku adjaneka omeva ngaashi kOnambutu, Onamukulo, Ongenga, Onakalunga – Omundaungilo, Endola, Omafo, Ondobe, Epembe oshoyo Eenhana.

Omunambelewa Omukulunhu mOshitukulwa Ohangwena Fillipus Shilongo okwa  ti oku uditeko onghalo yomumbwe yomeva moshitukulwa, nokwa indila oshiwana shi kale sha ngungila manga taku kendabalwa opo ku ku fwepo omukundu woku ena omeva a yela. Okwa ti Ohangwena otai longo nodjungu opo i kale ya fikifa omeva ku keshe umwe. Shilongo okwa ti okudja mo2014 oshitukulwa osha longa noku etapo eenhele doku kufa omeva difike 964, novanhu ve fike 4278 ova mona omeva opaumwene okudja peenhele odo.