Omunambelewa omukulunhu ta wilike evyulonghalo moshilongo koshi youmiministeli weameno yoikwameni yoshilongo nomaupitilo okeengaba Raphael Hamunyela, okwa indila opo osho oshiwana unene ovapambele vovanadolongo va talele po vakwao. Hamunyela okwe di popya pepatulula lombelewa yomayakulo opolifi ipe mexuliloshivike moshitukulwahoololo shEndola, moshitopolwa shaHangwena.
Elalakano lokuandjakaneka oikwafifo unene keenhele odo da taalela omashongo e lili noku lili, otashi xwepopaleke nokuendelelifa mokueta omayakulo popepi noshiwana, osho shi li yoo oishonekwa noinakuwanifwa yepangelo.
Hamunyela okwa yelifa momumbwalangadjo kutya pauyelele oo wa didilikwa komebelwa yaye eshi a ndjadjukununa kutya ovakayulinyanga ohava di nove li moshiwana. Ta popi meukililo, Hamunyela okwa tofa mo moitanaisho yaaveshe va holoka poshiindingili eshi tati, “Eembudi otadi di momaumbo etu, ounona vetu. Luhapu komavyulonghalo otwa mona kutya ounona ava tava vake ile tava longo oilonga yoimbuluma, unene, ovo vo inava mona ohole ya wana okudja kooxe. Moikando ihapu ounona ovo ooina inava hala ounona vaye kooxe.
Onghee nee ngeenge okaana oka kala inaka mona ohole yaxe ohaka kala ke na oupyakadi mokuputuka,” Hamunyela ta yelifa.
Hamunyela okwa twikila yoo nokutumbula kutya eshi okaana taka ka kula, odjuulufi ile omhumbwe yohole yaxe oyo ihe mo muko ohashi eta nee opo omunhu a kwatwe kehandu, nashi ohashi eta ashike okulonga oimbuluma. “Oto hange taku ti okaana ihaka udu ko, okutya eshi sha fimana okaana oka pumbwa ashike ohole.
Onghee nee ohandi indile, vaholike tu efeni ounona va ye kooxe. Kutya xe ke na sha, okaana kake shi ngee xe ke na sha. Ohole oyo ashike tai dulu okukelela opo okaana kaha kufe ombinga mouxwapindi,” Hamunyela takumaida.
Hamunyela okwa tofa mo kondadalunde nokudimbulukifa oshiwana kutya omaludalo oo e li komavyulonghalo, ovadali vahapu ove a punguluka ihave a file oshisho noihava tale ko vali ngee va tulwa mokalimosho.
Ota indile opo ku filwe oshisho ovapambele ava tashi ningwa mokuvatalela po omafimbo nomafimbo, manga ve li molweendolongekido levyulonghalo.
“Vakwetu ounona ava nee ve li komavyulonghalo haame nde va dala, onye ngaho mwe va dala. Ashike efimbo eli ovange, ounona vange nohandi kendabala oku va pa ohole opo va lundulule meenghalamwenyo davo,” Hamunyela ta kunghilile.
Okwa twikila yoo nokufatula oshinakuwanifwa shomavyulonghalo kutya oo aeke moshilongo haa dulu okulundulula oukwatya womunhu unene tuu ngee tashi ya kokulundulula nokweefa po aishe ya nyika owii.
“Oilonga yange oyo nee oyo. Luhapu oupyakadi wange osheshi kutya ounona veni ove li komavyulonghalo, ndele inamu hala okuya ko. Fikameni mu ka talele po ounona veni, kutya nee oka ningile shike, natango eshi taka di ko okaana koye ashike. Ame itandi kala navo alushe, ondi na ngaho oku va eta.
Onghee ohandi mu indile tu longeleni kumwe.” Hamunyela ta indile. Lwaxuunina Hamunyela okwa denga omufindo opo oshiwana shi waimine nokulongela kumwe mekwatafano nomavyulonghalo opo ku hangwe elalakano levyulonghalo.