Minista gwiikwameni, egameno lyokoongamba nepopilo lyoshigwana Albert Kawana okwa ti okwa hala okuthiga aapolisi ya mona omagumbo manga ina ya moshipundi shevululuko.

Kawana okwa popi ngaaka Olyomakaya sho kwa li taya ningi oshikonga shopolisi moshitopolwa shaShana.

“Sho nda li nda ende mpeya naampeya, onda ndhindhilike kutya aapolisi kaye na mbili, oye na olungwenye omolwomaupyakadhi ya taalela,” ta po pi ngaaka.

Kawana okwa ti wo okwa sholola komalukalwa gaapolisi, itaa ga hokitha nando.

Ta hokolola nkene ya yile koshilongo shontumba nanakusa omupelesidente Hage Geingob hoka ya zile ko ya fuulwa komalukalwa gaapolisi.

“Geingob okwa lombwele ndje opo tu kuthe oshiholelwa oshiwanawa opo aapolisi yaNamibia nayo ya mone omagumbo,” ta ti ngaaka.

Kawana okwa ti oshoka edhiladhilo ndika olya kala lyi li miilonga nota tsikile okukondjitha a thige aapolisi ya pewa omagumbo.

Okwa ti okwa hala oshitopolwa shaKhomas osho shi tamekwe nasho omolwomatompelo ge li po, yo iitopolwa yilwe tayi landula ko.

“Epangelo otali tsikile okulonga nuudhiginini, nuumvo otwa yelaayela oomeme nootate ye li momizalo ya pita po7 000 moshilongo ashihe,” ta ti ngaaka.

Ta ti, oombandi ndhoka odha gandjwa okuza poorenga dhopevi sigo opu chief inspector.

Okwa ti nuumvo natango oya topolele iitopolwa iiyenditho.

-vkaapanda@nepc.com.na