OSHAKATI - Omupresidente Nangolo Mbumba okwa kumagidha aapolisi mboka ya mana omadheulo goomwedhi omugoyi gopolisi opo ya longe yi itula mo yo ya shunithe pohi iimbuluma mbyoka yi li pombanda moshilongo.
Mbumba okwa kumagidha ngaaka Omaandaha sho aapolisi ye li 1 060 ya ningilwa oshituthipititho shawo mOshakati, pokapale kemanguluko.
“Omakwatokoonkondo, omadhipagathano, omayugo osho wo iimbuluma yilwe otayi holoka moshilongo, notayi indjipala kehe siku,” ta popi ngaaka.
Ta kumagidha ta ti, ngele oya longo yi itula mo otaya vulu okweeta elundulukom ndele iimbuluma tayi shuna pevi.
Kakukutu komatanga gopolisi Joseph Shikongo esiku ndyoka okwa pandula ayehe ye shi pondola momadheulo gawo.
“Otandi kumagidha amuhe mu longe nuuyuki, opo wo nane esiku limwe mu ka lele ngaashi naana aakuluntu yopolisi ya thikama mpaka nena,” ta kumagidha ngaaka.
Aakuluntu yiitopolwa oshowo yoorenga dha yooloka oya pewa omapapa omolwo kudhiginina kwiilonga yawo oshowo uuyuki.
Natango aapolisi ye li 16 oya tothwa mo muyakwawo noku pewa omapapa onga aadhewulwa dhingi.
Selma Shikulo yina yomupolisi gumwe opo a mana omadheulo ge okwa ti, ita mana okuligola nokupandula.
“Omumati gwandje ngoka oye ta kala ta eta omboloto megumbo oshoka onkalo twa taalela kayishi okuhokololwa. mOshiwambo ohaku ti, Kalunga iha dhipagelwa oyana, ashike oshoshili,” ta po pi nomahodhi taga tondoka.
Oshituthipitithi shoka osha gongalwa kaanenentu okuza komutumba gwopashigwana osho wo yamwe ya zi koshishindalongo Angola.