Paulina Ndalikokule
Omunambelewawiliki mombelewa yomuprima I-Ben Nashandi okwa kunkilile aanafalama ya kuthe ombinga miinyangadhalwa ya tulwa po kepangelo mokukondjitha oshikukuta.
Nashandi moonkundathana naKundana okwa ti aanafaalama naya longithe ompito ya tulwa po kepangelo mopolohalama yokukwathela aaniimuna ndjoka tayi yambidhidha aanafaalama noshimaliwa kehe kelanditho lyongombe, oshikombo nenge onzi.
Epangelo olya tula po kutya omuniimuna kehe ota vulu okumona oshimaliwa sha thika po N$56 250. Nashandi okwa ti kehe kongombe tayi ka landithwa, epangelo otali ka gwedha ko oshimaliwa sha thika poN$750, nomuntu kehe okwa i okulanditha oongombe dha thika po75. Kehe oshikombo nenge onzi omunafalama ta ka landitha ota ka pewa oshimaliwa sha thika N$150 nota vulu okulanditha iikombo, oonzi nenge ayihe yilimumwe yithike po 375.
Nashandi okwa ti ota ya ka futa ko kondando yiiyenditho mbyoka anafaalama taya ka longitha mokutembudha oongombe dhawo okufala komahala guunapelo wu li hwepo, osho wo oku ka futa ko koshimaliwa shaamboka taya ka hiila omahala guunapelo.
Ta ti opolohalama yokukondjitha oshikukuta oya gandja woo ompito kaanafaalama ya lande iikulya yiimuna mbyoka uumininisteli wuunamapya tawu ka landa nokutopolela pomandiki gomahumehokomeho guunamapya moshilongo ashihe mpoka aanafaalama taya vulu oku yi landa kondando taya kuthilwa ko.
“Otu na iinyangadhalwa iyindji tayi kwathele aanafaalama unene tuu okupitila muuministeli wuunamapya, omeya nomatulululo gomavi, aanafaalama naya konge owala omauyelele ngoka,” Nashandi a ti ngaaka.
Nashandi ta indile aanafaalama ya iyuthe kiipumbiwa mbyoka tayi pulwa okweetelelwa opo ya vule okupewa iimaliwa mbyoka.
Omukuluntu gwehangano lyaanafaalama moNamibia Kuni Shamathe okwa pandula epangelo molwoonkambadhala dhoka tadhi kondjitha oshikukuta kiimuna, ta indilile aanafalama kaya tegelele iimuna yi mone iihuna unene koshikukuta oshoka oondando dhiimuna otadhi ka shuna pevi.
“Shika oshiwanawa lela kaanafaalama, oshimaliwa oye shi gwedha nookuli, otatu indile owala ya endelele okugandja iimaliwa mbyoka opo aanafaalama ya vule okulanda omwiidhi,” a ti ngaaka
Ta ti epangelo nali ninge woo oonkambadhala oku kwathela iimeno uuna omvula ina yi loka nawa opo yi shuwe oku tsikila okukoka noku gandja iipalutha nonando omuloka omwiinayi.
Shamathe takunkulile aanafalama yandulukepo omikalo dhoku eta po iikulya yiimuna.
Omakwatho ngaka oga tameka nale okugandjwa mu 1 Apili nuumvo nota ga kahula mo 31 August 2024 tashi kwatelwa komeho kuuministeli wuunamapya.