Minista womidingonoko, omapashiyono neefuka, Pohamba Shifeta okwa ti osha fimana ngeenge oshiwana tashi kaleke po eameno lomiti.
Okwa ti eameno lomiti ola fimana molwaashi omiti ohadi dulu okulongifwa pamikalo da yooloka.
Edi Shifeta okwe di popya kefiku ledimbuluko lokukelela oshikukuta nokukelela embuwapalo mounyuni, Omaandaxa kEenhana.
“Ovanhu nava pewe ehongo kombinga yefimano lokutwika omiti momidingonoko davo,” Shifeta ta ti.
Oshiwana okudja koikandjohoololo ya yooloka mOhangwena, ovaleli vopamifyuululwakalo osho yo minista womidingonoko okwa li va ngudumana okupaafana omayele.
Efiku eli ohali dimbulukiwa mounyuni omudo keshe okukaleka po eameno lomiti lokukelela embuwapalo.
Shifeta okwa weda po ta ti neudo ouministeli waye otau yandja oimeno i li o30 000 opo i dule okutwikwa.
Okwa ti eshi osha fimana molwaashi otashi xwaxwameke oshiwana shi kale shi na ohokwe yokutwika omiti momidingonoko davo.
Ngoloneya woshitukulwa shaHangwena Sebastian Ndeitunga okwa popya ta ti neudo mOhangwena omwa lopotwa ovanhu 40 000 ve li momhumbwe yoikulya molwonghalo yoshikukuta.
Omwaalu ashike tau tengenekwa u fike 16 000 va didilikwa va pewa omakwafo oikulya neudo.
Ndeitunga okwa ti ovanhu vamwe otava xupu noudjuu okufika kexulilo lomudo molwokuhe na oikulya ya wana.
“Epangelo otali twikile okulonga noudiinini okukwashipaleka kutya oshiwana osha pewa oikulya yoshikukuta,” ta ti.
Okwa ti ombelewa yaye otai twikile nokuninga omapekapeko koikandjohoololo ya yooloka kombinga yovanhu va pumbwa oikulya opo ku kelelwe ovanhu tava fi kondjala.
Neudo ombelewa yomuprimaminista oya tula moilonga oporogalama yokuyandja oukalata vokulanda oikulya koshiwana koitukulwa ya yooloka.
Ombelewa yomuprimaminista otai kwashipaleke kutya kape na Omunamibia ta ka lopotwa a fya kondjala.