Ovanhu 30 ova xulifa moshipangelo shaShakati okudja muApiilili 2023 fiyo oomu Apiilili 2024, molwoitiyanafiyo itai longo nawa.
Edi oda popiwa kuMinisita wouhaku Kalumbi Shangula pefimbo ta tambula ko omaano omaano omashina okukwafela ovanhu ve na oitiyanafiyo itai longo nawa a dja kehangano loDebmarine Namibia.
Shangula ta ti okudja muApiilili wodula ya dja ko, oshipangelo shaShakati osha yakula ovanaudu voitiyanafiyo vape tava pumbwa okuya keshina ve li 133. “Ovanaudu ve li 35 vomwaavo ova veluka, ve li 38 natango ove li momake oshipangelo, ava ve na oudu woitiyanafiyo wa kolonda oveli 27 nova tuminwa koipangelo yopaumwene, vatatu ova tembukila koitukulwa imwe, nashi tashi nyikifa oluhodi, ovanhu 30 0vo va xulifa,” Shangula ta ti.
Ta wedapo kutya, omashina okwe ya pefimbo li wa shaashi ouministeli owe li pyakidila notau hale oku mana oku longekida onhele yoipundi 12 yovanaudu hava i keshina lodialysis mOshakati.
“Ouministeli oweli pyakidila oku lundululila etungo olo la li osaala yoTB nale opo li ninge po oDialysis Unit nokwa teelelwa i yuulule omivelo dayo moule weemwedi dinini komesho,” Shangula ta ti.
Ehangano loDebmarine Namibia, onghela ola yandja omaano omashina ohaemodialysis machines a tatu e na ongushu yoomiliona N$1.5.
Moshipopiwa shaleshwa ponhele shomukulunhuwiliki wehanga loDebmarine Namibia Willy Martens osho shaleshwa komunambelewa pitifi mehangano Stella Iipinge, okwa ti Debmarine okwa tokola oku landela oshipangelo shepangelo omashina oku kwafela ovanhu ve na oitiyanafiyo ita i longo nawa moipangelo eshi va uda kutya oshipangelo shaShakati oshi na omhumbwe oyo momudo 2018.
Nonande va li va udaneka oku landa omashina omudo oo, etukuko loCovid-19 ola ka ya eudaneko olo moshipala, nomashina okwa ka dula ashike oku landwa mo2023, noku tulwa mo moshipangelo omwedi wadja ko.
Omashina oo, oo aeke e li mo taa yandje omayakulo ohaemodialysis moshipangelo shaShakati ashishe.
“Onda lombwelwa kutya pefimbo inatu yandja omashina aa, oshipangelo kwali sha fininikwa opo shi kale hashi tumu ovanaudo koipangelo yopaumwene, oshinima osho kwali hashi longifa oshikondo shouhaku noudjuu,” Martens ta ti.
Ta ti Debmarine namibia okwa hafa eshi ta yambidida epangelo meenghabadala dalo doku yandja omayakulo opauhaku noopanghalafano.