Charles Ndeumane
ONGWEDIVA – Uuministeli wiipammmbele yomeni lyoshilongo, omaendathano negameno owa ekelehi omapopyo ngoka ga popilwa omukuluntuwiliki guuministeli mboka komuniilonga e shi ningi okupitila momunapolitika Michael Amushelelo komalungula.
Omupehakuluntuwiliki guuministeli wiipammbele yomeni lyoshilongo, omaendathano negameno Jackson Wandjiva okwa popi momushangwa kiikundaneki kutya omalundilo ga ningilwa omukuluntuwiliki guuministeli mboka Etienne Maritz kutya okwa hala ashike aazayizayi Aaeuropa oyo taya yakulwa kuuministeli manga ta ningi aaAfrica okatongo kage li mondjila, oga ningwa nelalakano lyokupukitha oshigwana, oshowo okuteya po einekelathano pokati kuuministeli mboka naaniilonga yawo.
Omapopyo ngaka oga popiwa komuntu ngoka inaa tumbula edhina lye, anuwa ha longele uuministeli mboka, eshi ningi oku pitila momunapolitika Michael Amushelelo komapandja gokomalungula. Okwa ti Maritz ina hala aazayizayi aAfrika ngaashi Aangola naaSouth Afrika mboka taya kongo oombapila ngaashi omikanda dhokukalelela moNamibia ya pewe omakwatho, anuwa okwa hala ashike aazayizayi Aaeuropa oyo taya pewa omayakulo ngoka shaashi aakuluntu ye Aandowishi.
“Oshiwike sha zi ko Maritz okwe tu pe omalombwelo tu gandje omikanda dhokukalelela moNamibia kAaeuropa yahetatu nAachina ye li 16 ashike okwa ti inatu gandja omikanda ndhoka kaazayizayi aaAfrika, naaniilonga mboka ta ye ke shi ninga anuwa oye li muudhigu,” osho omuniilonga ngoka edhina lye inaa li tseyika a ti ngaaka momushangwa okupitila muAmushelelo komalungula. Okwa tsikile ta ti Maritz okwa pitilila oomvula dhopenzela (60) ashike natango ota longele owala uuministeli, shoka e wete sha puka.
“Omapopyo ngoka kage na uukwashili oshoka uuministeli owu na omilandu nooveta ndhoka dhi na okulandulwa. Omikanda dhuukwatya mbuka ohadhi piti momake gaanambelewa oyendji manga inaadhi gandjwa kwaamboka ye dhi pumbwa, tashi ti Maritz awike ke na uuthemba wokutokola kutya omikanda ndhoka otadhi pewa oolye,” osho Wandjiva a popi ngaaka.
Uuministeli inawu tya ko sha komapopyo kutya Maritz okwa adha oomvula dhopenzela ashike natango oku li miilonga.
– mrndeumaneraycharles@gmail.com