Kakutu komatanga opolisi Joseph Shikongo opamwe naminista gwiikwameni Albert Kawana oya li ya ningi oshikonga pamwe naakuluntu yiitopolwa yokonooli.
Shikongo okwa ti, oshikonga shoka sha tameke Olyomakaya otashi ka hula komasiku gokomeho.
“Otwe ya moshitopolwa omolwezaleko lyomaguwo giilyo yetanga lyopolisi tali ningwa Omaandaha kOndangwa, otwa mono kutya ndjika ompito ombwaanawa okutsakanena naakwashigwana yomoshitopolwa,” ta fatulula ngaaka.
Ta ti, elalakano okuwayimina nokugandja omalongo koshigwana oshowo okushipukulula mpoka sha puka.
Ta gwedha po kutya natango oya ningi oshikonga shoka okuuva mpoka oshigwana sha thikama mekwatathano lyawo noomeme nootate ye li miikutu, opo ya tseye nokutokola shoka shi na okuningwa. “Shoka twa hala iimbuluma yi shune pevi ihe shoka otashi holoka ashike uuna kwa tseyika uupyakadhi hau eta iiningwanima yi li ngaaka, ko ku kuthwe etokolo tali vulu okukandula po uupyakadhi mboka,” ta fatulula ngaaka.
Kawana esiku ndyoka okwa kumagidha aapolisi ya tsikile okulonga nuudhiginini okulwitha iimbuluma opo yi shonopale moshilongo.
“Sho tandi ti tsikileni okulonga, itandi ti mu longithe oonkondo dhiilongo sha pitilila, ihe okuuvitha ko oshigwana shi longe shoka shi li mondjila,” ta fatulula ngaaka.
Oshikonga shoka okwa li sha kwatela mo, okuhinga kaape na omukanda, okwaalandula omikanda dhomashingithilo oshowo omalongo ga yooloka. Esiku ndyoka opolisi oya li ya tameke okupatolola okuza kOndangwa noya huulile mOshakati.