I Mbatjiua Ngavirue OTJOMUISE Omapitisiro kombepo zo Namibia Broadcasting Corporation otjiwana kutjitona ozongoze ndekaroko ndunondi nu muhuka azehakarako mazemunika ayo zakotoka rukwao nungwari kapena ngumatjiwa kutja otjikando ihi zena orure ndutapi. Mbepuratena ko mapitisiro wo kombepo aruhe mavetja Omandaha tjiyari hambombari ku Kambundu Otjiuru tjo NBC Vezera Kandetu wari kombepo mo murari wOtjiherero okutjivisa kutja omapitisiro ngari aya kuramisiwa maye kaondja komurungu rukwao. Kandetu wina wa raera ovapuratene kutja onganda indji “yeripura rukwao” ohunga no ku kawondjisira omapitisiro inga komapu woharive. Omataunaukiro ondonya wo NBC inga yaya kurwa iyo ova kongorere vo mapitisiro inga tjimuna o Chat Show, Open Line, Ewi Lyamanguluka na Indjo Kepu nai mbari avasengisa omapitisiro wao omasuverwa oure wotjivike. Posyo omakuramisire wo mapitisito inga yaeta omapuririo omengi nge hiyazirwa. Omatjivisiro wokutja o NBC yeri puriro rukwao ngawirire meyuva rimwe indi o Radio 99 tjiya utire omapitisiro woma toneno wozongoze wayo oini ya kurisirire ko ongurunguse motjina ihi. Ovengi mavemunu kutja o NBC yatarara tji yatia okukuramisa omapitisiro inga na ihakahana okupuratene komambo wo vei kwekurure wo mo mbembo. Umwe wo vatone vozongoze aruhe komapitisiro inga, Paul Helmut, watjere ondiero yo NBC oku ngunda ama ikuramisa omapitisiro inga no ku rirunga muyo ongendise mena rokutja maitunu kousemba wo urizemburuka womundu. “Ami memunu kutja tusuta ozongoze ndu tu tona nami okusuta ongoze tjazumba eraerwa kutja hihungire tjike ongahukiro kutja omatombero wo usemba wo urizemburuka wandje,” watjere. Komurungu Helmut watjere nandarire o NBC itja ovandu vetomba omapitisiro inga oku yambururira mo ovandu varwe ongondononeno komurungu yaraisa kutja ovandu mbetjita nao nandarire kaveyavaza vetano novandu vetatutu uriri. Watjere eye omwini oruveze nduakapita waningira ounane wo NBC okutuapo omirari mbi mavitjayere omatombero womapitisiro wo kombepo. Watjere omirari imbi moma pitisiro wo Tjimburu, Otjindoitji no wo Rukavango omuviri. “Momapitisiro inga tjimuna o Spreukbeurt ovatone ndoovazu kavena kuritizira po muhunga womapitisiro vekondua. Ouzeu ka mapitisiro nungwari okoo kutja motjayere ovandu ape omangete yevari okuripura no kutomba ouzemba wao wo urizemburuka. Ndoovazu mo ve raere kutja ngave hungirire kuye pasana nokutja mo verisa korutuwo,” watjere. Wayandjere ondunge yokutja omazengururiro okutjaera imba ovanadjo mbetomba omapitisiro inga nugwari kaku tjayera otjiwana atjihe okuhungira.