Auleria Wakudumo
Ongudu yoLandless People’s Movement (LPM) oya waimina ongudu yoIndependent Patriots for Change (IPC) okutwala okakomisi komahoololo komhangu opo va pewe epitikilo lokumona oilongifo ya longifwa pomahoololo opaupresidente noomutumba wopashiwana mo27 Novemba oshoyo omafiku avali a wedelwa hano o28-30Novemba omudo ou.
Ongudu yoIPC oya yandja nale omakemo ayo komhangu Omaandaxa, tai pula i pewe oufemba i konaakone oikwafifo aishe ya longifwa pefimbo lomahoololo omanga oLPM ya twala omakemo ayo mEtitatu.
Ongudu yoLPM oyati oya hala omwaalu wovanhu va hoolola, eembapila odo inadi tambulwako, noipundi oyo ya monika keengudu adishe ponhele keshe yomahoololo.
Ongudu oya holola kutya otai twala okakomisi komhangu molwaashi ina omalipulo omafiku aa a wedelwa omahoololo ngeenge okuli ngaho pauyuuki.
Nonande oIPC oya holola kutya oya waiminwa keengudu dimwe dopapolitika ngaashi oPopular Democratic Movement (PDM), the Body of Christ, the Republican Party (RP), oshoyo oRally for Democratic and Progress (RDP) opo va tule oukuni kumwe mokutwala okakomisi komahoololo komhangu, eshi ya twala eedocumente komhangu, ongudu oya ulika ashike kutya oili oyo aike moshinima eshi.
Eshi osha faafana nongudu yoLPM oyo nayo ya twala omakemo ayo komhangu ina i waiminwa kongudu yasha. Natango, ongudu yoLPM otai pula i pewe epitikilo lafa loIPC.
Momukanda wavo, LPM okwa holola omukulunhu wokakomisi komahoololo Elsie Nghikembua onga omunyamukuli wotete, Omunambelewa akula Peter Shaama onga omunyamukuli mutivali nOmupresidente woshilongo, Nangolo Mbumba onga omunyamukuli mutitatu nOhahendedjai Festus Mbandeka onga omunyamukuli wa xuuninwa.
“Ohatu pula epitikilo opo tu patulule nokuninga omakonaakono oinima aishe ya longifwa pefimbo lomahoololo o2024 oupresidente oshoyo omutumba wopashiwana peenhele adishe dali da ningilwa omahoololo okudja 13 fiyo 27 Novemba oshoyo omafiku a wedelwa, po07h00 fiyo 21h00,” omukanda woLPM tau ti.
Otava pula nee vati omunyamukuli wotete Nghikembua nomutivali, Shaama opo va nyamukule omikanda mbali da shangwa keengudu nokuyandja oyo ya tumbulwa momukanda.
Kakele koIPC noLPM, eengudu dihapu oda anya okutambulako oidjemo yomahoololo nadihapu oda holola kutya otadi ka katuka onghatu okutwala okakomisi komahoololo komhangu.
Omhangu yopombada vati otai ka pwilikina oshinima eshi mOmaandaxa, 16 Decemba 2024.