Omunafikola weedula 21 Wilhelmina Kashima okwa ti ita ka faula vali keetundi molwashi paife okwa yambididwa nokatemba koshinanena kehangano loTweyapo Fishing Investment.
Kashimba okwa pewa okatemba oshivike sha djako konima eshi ehokololo laye, ta popi nghee ta kongo ekwafo lokatemba lapita moshifo shoNew Era.
Omukainhu ou ote li hongo koshiputudilo shoIUM koWindhoek, te li hongele eifano loBusiness Management, noku li modula onhivali.
Kashima okwa ti okwa dalwa noulema ashike eshi itashi mu teya omukumo wokuhanga ondjodi yaye yokumana elihongo laye molwashi okwa hala okukalongo mombaanga.
“Otashi tunge yoo vali omukumo wokulihonga nondjungu molwashi paife onda mona okatemba koshinanena,” ta ti.
Okwa hokolola ta ti kena omaulu ye vali oku na okwooko kumwe, onghee ka kwa li ha dulu okulongifa okatemba oko kwa li e na tete shaashi ohaka pumwa kushinga omunhu ta longife eenyala adishe.
“Omafimbo amwe ihandi dulu okushanga molwashi okaoko oha kala ka loloka okuundula okatemba komalola. Onghee paife ohandi ka longa oinyangadalwa yange yofikola noupu,” ta ti.
Omunafikola ou okwa hokolola ta ti okatemba oko kwa li ha longifa ka kapu okulongifa komunhu e na okaoko kamwe molwashi ombinga imwe yomalola ka pena ou tei undula.
“Alushe ohandi lata keetundi shaashi okatemba oka ende ka shona. Paife ohandi ka fika keetundi pefimbo molwashi okatemba nda pewa oha ka endelele,” ta ti.
Kashima okwa ti pandula ehangano loTweyapo Fishing Investment eshi le mu yambidida nokatemba.
“Kalunga okwa nyamukula omailikano ange, paife onda manguluka nokuya kongeleka ile okukatalela po,” ta ti.
Omunambelewa a dja kehangano loTweyapo Fishing Investment, Rauna Kayambu okwa ti ka kwa li shi pu komunafikola ou okupita okudja kondodo yotete fiyo tai koIUM.
Onghee okwa ti eshi otashi ulike kutya Kashima oku na omukumo neenghono okulihonga nokukala a hanga ondjodi yaye yokumana elihonga laye.