Aafuko ya yakelwa okofa yoofeyi noolinga oya ti itaya mana oku pandula omolwa omakwatho yega ningilwa opo ya vule oku yapulitha ondjokana yawo oshiwike tashi ya.
Sakaria Kandadi na Adelheid Albin oya longekidha ohango yawo yi kale ko momasiku 30-31 gaAguste, ashike iinima yawo anuwa ya kwatela mo oolinga, ofeyi noshuta.
Yimwe yomomayambindhindho ngoka ya mono o ngaashi uulinga mboka ya yambindhindhwa nawo ku mwene gwehangano Omba Jewellery, Walde Namadi Shimooshili, oshowo N$10 000 ye yi pewa komutseyi veta Sisa Namandje.
“Onda yambindhindha ngaaka konima ndali nda eta olukeno sho nda tala aaholike taya lili yaana shoka taya hokanitha sho ya kanitha uulinga wawo wohango,” ta po pi ngaaka.
Shimooshili okwa ti, ohashi uvitha nayi okuyakelwa iinima yoye weyi longo nuudhiginini oshowo ethimbo ele, ihe otayi kana po ashike muule wokathimbo okafupi.
Omufuko gwomulumentu Sakaria Kandadi okwa kala e na omukumo kutya nonando ya yakelwa iizalomwa yawo yohango itayi shuna monima, oyina okudhana ashike naashoka shili po.
“Onda yambindhindhwa lela, itandi ka mana okutumbula omandhina ashike onda yambindhindhwa. Ongondhi yandje itayi fudha po okudhengwa oshigwana sha hala okutu yambindhindha,’’ ta pandula ngaaka.
Okofa ndyoka ya yakwa oyina ofeyi yomufuko, uulinga, ooshuta oshowo oongaku dhali dha nuninwa okuzalwa omasiku ga yooloka, omayigidho oshowo esiku lyohango.
Aaholike mboka anuwa oya kala omimvo dha thika pu heyali no ya kala taya longekidha ohango yawo ethimbo.
Aafuko oya kumagidha oshigwana shi kotokele oonakukotoka yutoo, mboka tayaka longitha oshiningwanima shika, onkene kehe ngoka ta kala a hala okuyayambindhindha na dhenge koonomola 081 3555 151 nenge 081 6717 7725
Opolisi moshitopolwa shaHangwena oya ti oshiningwanima shoka osha holoka oshiwike sha zi ko, ihe sigo onena inaya mona po uuyelele wa sha.
Aafuko ya yambindhindhwa…Aaholike ya yakelwa iizalowa yohango ya yambindhindhwa nuulinga oshowo oshimaliwa. Efano : Otwe li pewa