Taimi Haihambo
ONGWEDIVA – Ovanafikola vokoiputudilo aishe ya-IUM moshilongo, ova tameka oshivike shavo shomauliko opaipindi opamufyuululwakalo Omaandaxa.
Nonande omauliko opaindi haa ningwa keshe odula, ei ohai kala omhito yakula noihafifa kovanafikola, shaashi vahapu ava ve na ohokwe nohole yongeshefa opo hava monene omhito yokungeshefa oinima yavo.
Hilaria Ileni oo umwe womwaaava ve na outala, okwa ti ye ngeenge omhito ei ya fiki, kuye ehafo lambishi meumbo mwa tomwa.
“Ame ongomunhu e likolelela ashike moimaliwa yaNasfaf ongouxupilo, oshili ohandi kala ndi udite ombili nehafo lakula, shaashi ohandi kala nda mona omhito yokulinyangela yo vali kwaaame mwene,” Ileni ta ti. Tangi Lineekela oo naye e li omunafikola moshiputudilo sha-IUM, okwa hokolola kutya oha kala a pandula oshiputudilo eshi tashi kaleke po omufyuululwakalo.
“ Omukalo ou ohau tu hanganifa fyee ovanhu twomihoko da yooloka. Ohau eta yo oukumwe nokushiiva eshi hashi ningwa komihiko da yooloka moNamibia,” Lineekela ta ti. Okudja ngaho keexuxwa dOshiwambo, ombidi, oingali, omaungu, osho yo oikulya ei hai liwa komihoko da yooloka ngaashi Ovakavango, Ovaherero, Ovadamara nOvacaprivi aishe omo tai hangika moiputidlo ya-IUM keenhele da yooloka.Omauliko oipindi opamufyuululwakalo okwa tameka omaandaxa notaa xulu mOsoondaxa