ǀAEǁGAMS – Ai!âkam Presidenti, Hifikepunye Pohambab ge ra mî ǀomkhâi ra ǂgaoǀkhās ǀgapiǁgau!nâ!khaigu Namibiab digu !nâs ǀgaisa ǁgoaǂuis ase ǂhanub xa ra ǂkhâ!nâhe ǂnûiǂgāde ūba hâsa. ǁNā-amaga-i ge aitsama mâbasen universitaits International University of Managementsa (IUM) ǀoasase ǁîs di hâs !nâ ra dīǀoaǀoa, ǁîs di ǁkhāǁkhāsen!khaibas !hūb di ǂhabase ra khoraǂui îs īǁkhā i as kōse ǁkhāǁkhāsensa !hūǁîn tawa sī-ūga. IUMs ge !hūǁîn ǀguina ǁkhāǁkhāsens !ēde mā tama hâ xawes ge !auga!hūga xu ra ǁkhāǁkhāsen ǂgaon tsîna ra kō!gâ. Pohambab ge nē gowaǂuisensa ǁnāpab ge ai!â gere ǂoa wekheb Fraitaxtsēs ai IUMs di 14ǁî ǁâudīb 2 800 ǁkhāǁkhāsenǂuisen hâna ǂan!gâs ǁgauǁgaude mās dib tawa danagowa-aose gere !hoa soab ai ge dī. Nē kurib aib ge IUMs studentn !gôaba !auga!hūsi studentna !khōgā hâse 10 000sa !nā hâ studentn hîa Suid Afrikab, Botswanab, Zambiab, Zimbabweb, Angolab, Malawib, Mozambique, Tanzaniab, Sri Lankab, St Lucias tsî !hūb din ǀkha. ǁKhātis ge !auga!hōgu !nâ ǀkharisi berode Botswanab tsî Malawib !nâ ge hui-am. Nē kurib, 2018 di universitaitdi !harodi Afrikab !nâ di a ǀnōsaseb g era ǁgau IUMs 61ǁî !khais ai mâsa ǁnāpa a ǀnōsa 200 ǂoaǂamsa universitaitdi ǁaegu. Pohambab ge kai !gâiaǂgaob tsî !gôa!gâs ǀkha ge mî, IUMs ge ǁnâuguxoaǁguiba Universitaits Namibiab dis (Unam) ǀkha a xoa!gaosa sao ra !âgu ǂnamipe: ǁkhāǁkhā!khōǂgāb, ôa!nâde dīs, ǀasa xūna ǂâiǂuis tsî texnise !harib omkhâis hân ǂnamipe. Sîsenǁareb ge ǀgaiba tsî i ge nēti ī sîsenǁareb ǁnâugude ǀgaisase ra !khō!gâhe. ǂHanub di tsî aitsama mâbasen ǁkhāǁkhākhâis !khaigu tsî ǂnûiǂgādi ge nî ǂgaoǂgao!nâhe ǀguipa sîsenǁaresa ǁîdi di ǂandi, ǁkhāsigu tsî huisenūxna ǀgaiǀgai tsî ǀams ai Namibiab ǂnīsasib ase īs !aroma. ǀAe!khōs, !gōsase ǁora!khōs ge ǁkhiheǁkhōsa !âsa ra huru United Nations Omkhâisens Proxrammi !nâ, îs nēs !nâ-ū îaron tsî ǁoraǁgûdi ǁōga ǁkhae tsî hoa !hūbaisise ǂurusiba aimâisa ǁgūba. “IUMs ge 2014î kurib !nâ ǂguro !nās ase ǀae!khō-aona ge ǁkhāǁkhākhâitsoatsoa tsî nētsē ǁnā studentna în ǁkhāǁkhāǂuisens ǂhawegu ǂan!gâsa ge mā” tib ge Pohambaba ge mî. Pohambab ge ams ai nē studentna ge mîba, in tā ǁîn di ǁkhāǁkhāsendi ǀkha ǂhanub nî mā ni sîsen-i ǀgui-e si !âuǂû xawen ǁnān hîa aitsama ǂharugutsoatsoas ǂande ge hōba ǂoa tsî ǀhûhâsigu !nâ si sîsenǂnuwiba.