Charles Ndeumane
Epangelo lyaJapan olya gandja omayambidhidho goshimaliwa shoomiliona N$9 kepangelo lyaNamibia okupitila mopoloyeka yiikulya muuyuni opo shi kwathele mokukondjitha omukithi gwomanyutu miitopolwa mbyoka ya gumwa unene koshikukuta, ngaashi oshitopolwa shaHangwena oshowo shaKunene.
Pethimbo ta taamba ko omayambidhidho ngoka kuyele oshiwike shika, omupilimaminista gwaNamibia Saara Kuugongelwa-Amadhila okwa ti Namibia okwa taalela ondjala onene molwaomvula ndjoka inaayi loka nawa nuumvo, naantu oyendji inaya mona mo sha momapya.
“Muuyelele wondjala noshikukuta shoka sha dhenga oshigwana shaNamibia, omupresidente gwaNamibia Nangolo Mbumba okwa ndhidhilike ondjala onguudhigu wa pumbwa ekandulepo lyopaulumompumbwe momasiku 22 Mei 2024 nokwa tula miilonga oopoloyeka dha yooloka dhokukondjitha oshikukuta. Omayambidhidho goshikukuta oga kwatela mo omaandjakaneko giikulya, omayambidhidho goombuto dhokukuna, omayambidhidho gaaniimuna, oshowo okwaandjakaneka omeya kiitopolwa mbyoka ya dhengwa kenota,” Amadhila ta ti.
Amadhila okwa ti opolohalama yoshikukuta onene lela notayi pula oshimaliwa shobiliona N$1,3 ashike epangelo olya pondola owala okumona oshimaliwa shoomiliona N$596,5 onkene olya pula omakwatho okuza kiilongo yilwe muuyuni.
Omukalelipo gwaJapan moNamibia Hisao Nishimaki okwa ti okwi inekela kutya omayambidhidho ngoka otaga kwathele epangelo lyaNamibia mokwaandjakaneka iikulya yoshikukuta opo li kwashilipaleka uundjolowele nonkalonawa yaantu ayehe. Omunambelewa gwopolohalama yiikulya muuyuni Sem Uutoni okwa ti omayambidhidho ngoka ga gandjwa oga nuninwa aantu miitopolwa mbyoka ya tothwa mo kutya oyo ya mona iihuna unene koshikukuta ngaashi Ohangwena noKunene. Anuwa omagumbo miitopolwa moka otaga ka pewa uukalata wiikulya uule woomwedhi hamano. “Omayambidhidho ngoka otaga kwathele opoloyeka yiikulya muuyuni yi andjakaneke uukalata wiikulya kaantu ye li 26 555 moshitopolwa shaKunene oshowo moshitopolwa shaHangwena uule woomwedhi hamano. Moshitopolwa shaKunene otamu pewa aantu ye li 11 051 omanga moshitopolwa shaHangwena tamu pewa aantu ye li 15 504,” osho Uutoni a popi ngaaka.