Festus Hamalwa
Okaana keedula 10 oka ningilwa omatilifo kumumwainamati ndele vati te ka kwata onghonga lwoikando ya yooloka meumbo lavo. Oshingingwanima eshi osha ningwa okudja momwedi Apiilili fiyo oshivike sha dja ko momukunda Uudhiya Waakiinta moshitukulwa shaShikoto.
Omupopiliko wopolifi moshitukulwa shaShikoto Inspekta Ellen Nehale okwa hokolola ta ti omufekelwa weedula 25 okwa ningila ondenge omatilifo kutya ote i denge ngeenge oya lombwele ovakulunhu kutya oha i nokaana moixulo. Opolifi oya hokolola tai ti omufekelwa okwa kala nokuningila ondenge omunyonena wopaixulo lwoikando ya yooloka alushe ngeenge ovakulunhu va dja mo meumbo. Okaana vati ohaka kala ashike ka mwena molwaashi oka tila okudengwa ngeenge oke shi popi kovakulunhu.
Opolifi oya ti ouyelele owe uya kombada konima eshi okaana ka lombwela ina kutya otaka vele poukainhu wako.
Okudja opo okaana oka twalwa koshipangelo kuina nokukala ka ningilwa omakonakona opaunamiti. Omufekelwa ina kwatwa po natango, onghee omakonakono opolifi otaa twikile moshibofa shekwatonghonga.
Opolifi nghee tai twikile nokukumaida oshiwana shiha fiye vali ounona voukadona momaumbo novalumenhu molwaashi okwa didilikwa ounona voukadona va ninga oihakanwa yokukwatwa onghonga kovapambele vavo.
Oshiwana osha kumaidwa yoo vali opo shi kale tashi lopota oibofa yomakwatonghonga pefimbo.
– fhamalwa@nepc.com.na