Auleria Wakudumo 

Omupopiliko wopolifi moshitukulwa shaShana, Chief Inspector Thomas Aiyambo okwa kumaida oovene voihauto opo va kalele eetuwa davo eshi tadi koshwa kovalongi vopeecar wash opo ku keelelwe oiponga noubudi weetuwa. Eshi okwe shi holola sha dja eshi omulumenhu weedula 26, omunailonga wopo car wash a shinga fiyo omongulu yofikola oyo yali ina ovahongi vavali oshoyo ovahongwa. 

Oshiningwanima eshi osha ningilwa pofikola Angels Pre-school, Oshakati East moshitukulwa sha Shana, sha ningwa Etitano lwopo 09h50. 

Otaku hokololwa kutya eshi omunailonga a mana okukosha otuwa, vati okwa kendabala okushinga po otuwa opo peuye imwe. 

Aiyambo okwa holola ta ti vati omushingi okwa hangika ta shuna monima ndele ta twaalele ekuma lokakinda lali konima yonhele yokukoshela eehauto omanga otuwa inai kanghama. “Omuhongi weedula 37 okwa mona oshiponga momupolo nokwooko omanga ounona nomuhongi vali umwe, vadja mo inava mona oshiponga,” Aiyambo ta ti. 

Mwene wotuwa vati kalipo pefimbo loshiningwanima. Vati okwa etapo ashike otuwa ndele ta shuna keumbo li li popepi nocar wash. 

Omakonakono a ningwa vati okwa ulika kutya omunailonga kali koshi yodungo ashike okwa patululilwa oshibofa shokushinga nouhasha nokushinga ehena ombapila yokushinga. Aiyambo okwa kunghilila yo oovene ve car wash opo va kute ovanailonga vena eembapila dokushinga ku keelelwe oiponga nekano leemwenyo molwa ovanailonga vehena eembapila tava shingi peenhele davo. 

-wakudumoauleria@gmail.com