Omupresidente tai moshipundi shopendjela Nangolo Mbumba okwa kumaida oilyo yeumbo lomutumba wopashiwana opo i kale nombili nokulonga noukumwe. 

Mbumba okwa li ta popi mEtivali pefimbo ta lekele oilyo yokeumbo komutumba yopashiwana. 

Okwa ti oshikako shaye shokuninga Omupresidente oshe uya pexulilo nena. 

Netumbo Nandi-Ndaitwah ota nangekwa mongula pambelwa a ninge Omupresidente Omutine waNamibia. 

Mbumba okwa pandula oilyo yokeumbo lomutumba wopashiwana eshi ya longela kumwe naye okudja omudo wa dja ko fiyo oneudo. 

“Otwa kala nombili nokulongela kumwe keumbo lomutumba wopashiwana. Elalakano okukundafana nghene tuna okuyambula po Namibia,” ta ti. Okwa weda po ta ti ovanhu va hoololwa tava i keumbo lomutumba wopashiwana loshikando shotete nava ka longe noudinini molwouwa womuNamibia keshe. 

“Twikileni okulwifa onghalo youkwamuhoko noulingilingi,” ta ti. 

Mbumba okwa ti okwa wilika pefimbo shidjuu omo Omupresidente Hage Geingob noshoyo Omukokolipresidente Sam Nujoma va xulifa. 

Efiku olo, ovaleli voilyo yomutumba wopashiwana va dja keengudu dopapolitika da yooloka ova tanga Mumba onga omulumenhun ou kwa li e na ewiliko liwa noukumwe. 

–fhamalwa@nepc.com.na