ONGWEDIVA – Omupeduminista Daniel Kashikola ou a kufwa moilonga komupresidende okwa ti okwa tambula ko ekufomoilonga laye, ngaashi naana kwa li a tambula ko oshinakuwanifa shokuninga omupedu minista koshikondo shoikwameni neameno lokeengamba.
Okwa ti omupresidende okwa longifa omukalo wafafana nomukalo ou kwa li a longifa okuulika Kashikola a ninge omupedu minista.
Etivali omupresidende Hage Geingob okwa kufwa Kashikola moilonga nokuulika Lucia Witbooi a ninge omupedu minista wouministeli woikwameni neameno lokeengamba. Eveline Nawases-Tayele okwa ulikwa a ninge omupedu minista mouministeli weedoolopa nomahambule okomikunda.
Omupresidende Geingob okwa ulika yoo vali Natalia Goagoses omupedu minista mouministeli wehongo lopombada. Kashikola okwa kala omupedu minista mouministeli wopolifi neameno okudja momudo 2015 fiyo oneudo.
Meenghundafana davo naKundana va ninga Etitatu Kashikola okwa ti ke li omhinge netokolo la ningwa komupresidende molwashi omupresidende ota longo oilonga yaye ngaashi naana sha ufwa kekotamhango lokatendo laNamibia.
Kashikola okwa yelifa ta ti yee ina kufwa moilonga molwashi a ninga epuko onghee okwa kunghilila oshiwana opo shi xulife po okutandaveleka oipupulu kutya okwa kufwa moilonga shaashi hanu omalodu unene.
“Ita ndi ke li didimikila omunhu ta kakeke edina lange moinima yoipupulu. Onda mona ovanhu va shanga komalungula kutya onda kufwa moilonga shaashi handi hole okumwa omalodu mahapu,” Kashikola ta ti.
Okwa ti ota twikile okukala omuleli wopapolitika noshoyo okuwanifa po oshinakuwanifa shaye keumbo lomutumba wopashiwana.
“Onda pandula omupresidende eshi kwa li elinekelange oshinakuwanifa shokukala omupedu minista nokuyakula oshiwana shaNamibia koshikondo sheameno noshokuyandja omaufemba,” ta ti.