Muňoli: Eveline de klerk
Swakopmund– Ya latelela Ngambela wa naha mutopehi Marco Hausiku na ize likolo le li bona za mubu li abe mubu kaku likanelela ni ku beya mubu okona kusebeliswa kwa njimo fa tuko. Kakuya ka mubulelelo wa hae Hausiku na ize, kabelo ya mubu i swanela kuya kwa batu baba itengile mwa njimo kuli naha I sike ya talimana ni lukupwe.
“Ha ku sina kabelo ye likanelezi ya kufa mubu, ku kona kuba ni ndwa mi batu bakona ku ipulaya, ki kafo ki kwa butokwa ahulu kueza cwalo.”
Mutopehi Hausiku na bulela kwa babeleki ba likolo lelibona za mubu ba balikana mashumi ama lalu nako yeo ne bakwalula mukopano wa mazazi a mane ono ezahezi mwa tolopo ya Swakopmund. Mutomo wa mukopano woo ki ku talima mayemo a mubu n ni ku cica mo kutokwa liciceho.
Mutopehi Hausiku na ize mubu kiwa butokwa kwa zwelopili ya naha mi likolo liswanela kubona kuli mubu u fiwa ka kulikanelela. Hape na zwezi ku bulela kuli batu ba naha Namibia ba bata kubona mubu ha u fumanwa ka bubebe ni batu ha bayaha ni ku ina fa mubu woo.
Ni hakuli cwalo batu bao baba za maisa za mubu ba swanela ku bona kuli nto yeo i ezahala hande, kuli bahulise njimo mwa naha. “ Mubu ukona kutisa ni kufepa batu ba ba ina fa mubu woo heba inge ba usebelisa hande. Taba yemwi ki ya kuli mubu ha u ipumanelwi feela , ka ku ziba kuli mubu kiyo munyinyani bao ba ba nani litohonolo ni ku fumana mubu woo ba swanela ku itumemela ni ku usebelisa mwa zila ya bulimi, ku bulela mutompehi Hausiku.
Ka ku ya ka mubulelelo wa hae, mutopehi Hausiku na ize mubuso wa ziba matata a o likolo la mubu batalimani ni ona ku amana ni mubu. Ni ha kuli cwalo luswanela ku ziba kuli taba yee ya kufa mubu ni bukelezo ya mubu ya tula, ‘kwa tula ku fumana lika ze sebeliswa ku ona musebezi woo.
“ Kutata ahulu kukona kuziba kuli ki ufi mubu o kaswanela njimo, mi hape ku tata ahulu ku aluhanya mubu woo bakeňisa mayemo a lihalimu a sweli ku cica a swana inge a linanga ni muunda, ku bulela mutompehi Hausiku.
Mi mutomo wa mukopano woo ki ku bona kuli taba ya aluhanyo ya mubu yenekile ya kalisa ka lilimo 23 ze felile ize i talimiwa.