ǀAEǁGAMS – Ai!gû ra ǀkhurub mâsib Aminuis ǁHûi!nâǂharis hîa Omaheke ǀKharib !nâ ra ǁnās dib !aromas ge Kabinetsa ǁnāti ī aoǁguigu hîa ge Beros ǂGuro Ministers disa xu a ǂoaxa nē tsâǀkhāsa hûhâsiga huis !aromaga ge !khō!gâ. ǀKhurub nēb ge ǀnanub di ǀkhais ǂoago kurib tsî nē kurib !nâs xa ge !aromahe tsî nau ǀkharigu hîa ge !gâi!gâ tsî ǀnanuba hō hâ i tsî ǁîn di !hanagu di !gâi!gâba ra ǀamagu khami nē ǁhûi!nâǂharis !aroma ī tama hâ. Kabinets ge a !khō!gâs ge nē ǀhōhâsigu nî 7 000 ǁhōdi !horoba nî !khō!oasa hîa Japanni di ǂhanuba xu huib ase ǀkhaehe hân tsî maiǁhōgu tsîna, ǂû orosib mâsiba oresa hōbas ase.
Nē ǀgoraǂuis nē ǂûnhuib dis ge 1 ǂNūǁnâiseb 2018 disa xu nî tsoatsoa tsî 31 !Khanni 2019 kōse nî !khoe. !Nakaǂnôa Ministeri ǂAns tsî ǁNâu-tsî-!Hoaǂharugus ministeris dib, Engel !Nawatiseb ge nē ǂhaitsi ǂanǂansa ǂoago wekheb Donertaxtsēs aib ge ǂhôare!khaiga, Kabinets ge Wunstaxtsēs ai a ū mîǁguigu ǂnamipe gere gowaǀî soab ai ge mā!kharu.
!Nawatiseb ge nē ǂûǀgoraǂuis ǂnamipe ge mî, mâ khoen nî nēti ī ǂûna xawas tsî xoamâisens tsîn nî dīhesa xoaǁguisa ǂgaoǀkhādi air a dīǀoaǀoa ǀhûhâsigu omaridi !aroma tsîs nēsa Omaheke ǀKharib di ǀKharisi ǀAwemā!nans beros !nâ-ū nî dīhesa. Kabinets ge a ū mîǁguib !oagun ge nē khoena ǁnāti ī ǀkhurubhuiba !goaxa kurib !Khanni ǀams kōse nî !khō!oa.
Aminuis ǁHûi!nâǂharis ǂGiǂgosi ǀAwemā-aob, Peter Kazongominjab ge ǀkhurub mâsib di ǁkhōǁkhōsasib ǂnamipe ǁîb di ǂâiǂhansensa ǀgūǁae gowaǂui tsî ǀgaisase ǂhanuba ge ǂgan îb nē ǀhûhâsiga kaise !hae ǁaeb !nâ mâxōǀkhā. Kazongominjab ge ge mî, nē ǀkhurub mâsib kaise a ǁkhōǁkhōsa tsîn ǂauna ǂgari-aona ǀnai !gomma ra tsâsa, ǁnāpa-i !û-aib ti nî ǂgaihe xū-e ûitsamaxūn !aroma a ǀkhai amaga tsîn ûitsamaxūna !khoe-amhe taman nî īs kara o nî ǁōǂoatsoatsoasa. Kabinets ge ai!â a mîs ge îs ǂGuro Ministers berosa nē mâsiba kō!hara tsî aeb ai Kabinetsa ǂanǂan.