WINDHOEK – Omumvo nongola tuu shili, nuumvo oya li omvula ombwaanawa kaahikingalo oyendji yaNamibia sho ya pititha ooalbuma dhawo. Ashike omu na edhina limwe tali kwelengendja noli li olyo tali dhana onkandangala kehe mpoka to yi. Leonard Makili, a tseyika nawa moshimpungu shoongalo onga Kaboi Kamakili okwa kwata ko ohambo nomaholo gayo. Okwa tameke okupititha uungalo we uufupi komapandja gosocial media, hoka aantu oyendji ya kala noku u andjakaneka omolwa oshitalenti shoka e na.
Omunamimvo 21 nguka omukalimo gwomOndangwa okwa li a gwitha oyendji kiipundi sho a li nokwiimba oongalo dhi na omuthindo nomadhengo taga hokitha. Moonkundathana naKundana, Kaboi okwa li a popi kutya oongalo okwe dhi ilonga mepupi lyoomvula oonshona, ta ti okwa kala wo ha ndaanisile omuhikingalo Mushe manga inaa tameka okwiimba kuye mwene. Nonando a kala nokunana nondatu ngaaka, Kaboi kamakili okwa kala nokupalaapala nokupititha oongalo mpano naampeyaka. Nuumvo okwa li wo a mono ompito yokwiimba ngaashi moTottem Expo noKasi Vibe. Kaboi ngoka ta ti kutya osikola okwa ti shilindi manga omolwa ompumbwe yoshimaliwa okwa hala okupititha oalbuma ye manga Aguste inaa thika, nokwa hala okulongela pamwe naahikingalo ngashi Exit, Top Cherie naM-Jay okutotha mo ashike aashona.
Ngashingeyin okwa shainwa po kehangano lyoongalo On Fleek Music Production. “Onda hala okukala tandi ulike oshitalenti shandje pomahala ga yooloka, naangoka a pumbwa ndi mwenyeke ota vulu okukwatathana nameningela gwandje Abed konomola 0812115440.”