I Kae Matundu-Tjiparuro
OKAHANDJA
Otjiuru tjOvahona tjOuhonapare wOmbazu wOmbanderu, Erastus Tjiundikua Kahuure, maningire ondjesiro kOmbara George Simasiku Mamili wOvamafwe nawina Omukuramenepo wOkehi wehi rOvandoitji mo Namibia, Ute Koenig, kongaro yombameno ndjari mOkahandja Osondaha nu kangamwa oruveze ndja tja ipamuka.
Kahuure wina watja ndoondo kohoromende ya Namibia okupitira mo Ministera yOmananeno wOtukondua, Ozongomainde, Omara nOmekurisiro wOkozombanda, John Pandeni, nowo kehi ye, Kazenambo Kazenambo, kongondjero yao yo kuyapura ovimbumba vivari vyOmbanderu. Wina mOrutuu ndua hindua kozombuze Kahuure watanga oporise ko makarerepo wayo pomaamberero no ku riraisa kutja opuiiri. Koruseinina watja ko okunene okuhepa kOvanamutjemo okuriporinda no ku raisa outiha wawo natja ngave kayende komurungu notjikaro tjinga ongondjero yawo aya zikamena kozongunde zoharive na ihazikamene komapindi. “Otjirwa tjoku harisa omasa nokupa omananeno wOtjiwana tjOmbanderu ouyara ngatjikayende komurungu otja kongaro novitjitua, ombazu yotjiwana nawina Ongundeveta yehi,” Kahuure watja.
Ohani ndjiri mOmbanderu yari amai honapara po marangerero yOmbara yOvambanderu Kahimemua Nguvauva oetja 111 nga yandere notjivepo otjivi tjinga orutuu rovyungura ndua zuvasanenwe iyokomiti ohovekwa aruhaungurire.
Osondaha ovahenendu mbasere okukara porutuu otjo vahungire, Mamili na Koeniga, otja tji pari apazuvasanewa iyokomiti ohovekwa nOmbara tjandje vaisapewa porutuu nduaripo. Ihi tjapere Ovanamutjemo omitima omivi nu wina mena rongaro indji oporise poruveze indo okuza kembo ndazire kOtjomuise aitjivisa kutja ndoovazu kapena orutuu rumwe otja tji pazuvasanenwe, okutja ovimbumba ngavihanike. Ovanamutjemo veri tuvirire kondanda yao. Otjimbumba tjOmbara tja kaendere komurungu ape tji maikatona oimwe yomutenya norutuu indui orwatjo. Yari ape oizoiri mbari nohinga ovimbumba okuza no ku kotoka okuza kozongungu ndjiri oiri ovitjitua mbyasere kutja vyautu. Omaombero inga yari mongondjero yo,bitasaneno morutuu. Koruseinina ombara yOvambanderu ondja hungirire nandarire meraa roporise kutja ovimbumba ngavihanike mena rotutuu tu tuayarukire kutuvari.
Munai ongondjero yohoromende okupitira mo Ministera yOmananeno wOtukondua nOzongomainde, Omahandurisiro nOmara, John Pandeni, nowo kehi ye, Kazenambo Kazenambo, otjiyari omungandjo. Otjiveke tjitjazuko otjina tjo mayamberero tjavazere omberoo yo Ministera Ondenga Nahas Angula ngwe tji kapitisire ko Ministeri yOmananeno wOtukondua otjo ministeri yo merizirira novitjitua vyo mauhonapare wombazu. Pazuvasanenwe kutja ozokomiti mbari ozorarakane zomasembamisiro weyuva zerire imwe aihe younepo hambombari. Ngunda apazuvasanenwe nao Ombara yOvambanderu yavangaere okuweza ovandu vane komunda imbo umwe kutja owo nambano uhare ovandu omurongo na umwe ngunda imbo warwe auna hambombari. Kaari ongahukiro kutja ongwaye Ombara tjaa izeri nao. Ondero yOmbara indji yaririre otjipwite tjokomiti ohovekwa nu nganduu kOritjatano ngurova petjire Orovyungura ovimbumba tji vyasere oku ka handura mOkahandja tjandje kape yahara omuhunga nonaghukiro kutja omaamberero yakengama poo indee nu yeri mongee saneno? Epuriro indi rari mena rondiero yohoromende kutja ndoovazu ozokomiti inda kazeririre imwe norutuu rumwe, okutja poruveze indo nduri oruveze rongomainde ya Kahandja nu munao rohoromende otjipehina okukara ovitjitua vyOvambanderu.
Munao okomiti ikamunikwe ayo iimwe norutuu rwakarira rumwe kayari mena ro upupurukwe wOvambanderu oveni nungwari yari mena rondira yo ku patua oruveze ro ku woronganena po muno.
Munao otjiyari oukahuke kutja omeero wa pamwe wOvamamberu inga yari otjiwova uriri ngunda owo kaveya kotoka pamwe okurira omundu umwe. Indji ondjari ombepo omundu ndjoo hoza mOkahandja Orovyungura nawina Osondaha kutja opozondanda poo opozongungu. Pozondanda ovimbumba vya handurire otja movimumba mbumba mbya hanenwe pokati itotenda otjimbanduangoma murevezi odnui ndjasanene otjevanda ndahanene otjihuro ihi tjOvandoitji o Berlin pokati munda umwe aurire wOzokumunesa imbo warwe aurire wotjivepo tjomahi wokongurova.
Kutja nangwari ovita vya hahwa mo Mbanderu kaina omuyapure pozongungu Osondaha ovandu tjiva kaa veningire otjiwa notjiyangapara kovati novakuru vao nungwari tjimuna mbaa vesengi ovakwao. “Teuvemuna kutja vatanda tjike”, imwe yozoserekaze ya kuu re kovati nu zarwe ndari punayo azehondjo kuyo nomakwiiro peke peke ngatjama no humisire.
Pari noruveze wina otjimbumba tjimwe tjaa tjitanda okuhana otenda mu mwari ovimbumba nandarire ngunda ovimbumba avyahaama. Ouningandu tjandje nai oporise yeya motjivaro otjiwa nu omundu kona kutjiwa kutja omakarero wayo potjitjitua ihi yavaterere pupatapi kutja ovimvumba imbi aviha sekamasana.