Elago Shipanga

Kaiǀaub Tsūdī-aon Dī-unusen!khaib ge kai kuru!khaib om!nāxūn ase ra dawa!khunihe hîa ǂhanub ministeridi tsî ǂnûiǂgādi tsîna !nā-omxūna nî kurubase. Nē ǀaweǁguibab ge !Nakaǂnôa Komisares-xenerali, Namibiab Dī-unusen!khaib !Oabadi (NCS) dib, Sam Shaalulangeba, Kalenga ǂAm Skoli tawan ge nē ge kuru-unuhe hâ ǁkhāǁkhā!nā-omxūna gere ǁkhaeǁnâ ǁaxasib dib tawa ai!â gere ǂoa wekheb di Fraitaxtsēs ai Kaiǀaub !nâ ge ǂanǂan. 

Shaalulangeb hîa dī-unus ǁaxasin departementsa ra !khōdanab ge ge mî, Kaiǀaub Tsūdī-aon Dī-unusen!khaib ge a ǁhûiǂuihe tsî a ǁawoǁawohesa, !naokurus di sîsen!khaib hîa ǂâuǀoasa ǁkhāsiba tani hâ ǀgaisa xūna ra kurub ase. 

“Nē senters ge Namibiab Tsūdī-aon Dī-unusen!khaib !Oabadi, ǂhanub berodi, ministeridi tsî ǂnûiǂgādi tsî ǀnîhâ ǀhûhâsi tsî aitsama mâbasen ǂnûiǂgādi tsî ǀguiǀguibe khoen hîa nē !oabade nî ǂhâbana !naokuruxūn !nâ-ū !oabade nî mā !khaisa. Nē !aromadi !aromas ge sao ra tsēdi !nân hû kai !naokurus masindi tsî ǁnās ǀkha ra !gû-ǁare huisenxūn tsîna nē senters tawa nî sī !naoǁnāhesa.  Hāǀaro rasen ge, !kharaga ǂans ǁkhāsiga ūhâ dī-unusens !khaib mâisana Kaiǀaub sentersa !oa nau dī-unusens!khaiga xu  nî ǂnûibēhe, nēpa nî kai !gôab !nân xūna nî kuruhes di īǁkhāsiba ǂkhâ!nâse,” tib ge ge mî. Namibiab Tsūdī-aon Dī-unusen!khaib !Oabadi ge ǁ-îs xūkurus !oabade hû senterdi tawa !hūb a ǂhabase ra mā, ǁnāpas tsūdī-aona !kharaga !omkurus sîsenxasigu !nâ ra ǁkhāǁkhākhâise. 

Shaalulangeb ra mîsa !oagu ge nē ǁkhāǁkhāis proxramga !khōsabena !kharaga ǁkhāsigu !nâ ra ǁāǁā tsî supuse ǀhûhâsigu !nâ ǁkhawa oaǂgâsa ra ǁgūba. 

Kalenga ǂAm Skoli di 500 xa a !nāsa khôa ge hâ i ǂnû-ai!naodi tsî 30 xoa-ai!naon tsîn ge Kaiǀaub Dī-unusens!khaib senters tawa ge kuru-unuhe. Kaiǀaub ǁgau!nâs ǂharis di skol inspekteri, Markus Munengub ge -ǁîb di !khō!oas nē kuru-unusa xūn dis !nâ ge ǁîb di ǀons !nâ ǀkhaib apa gere khomaihe gangans !nâ, Namibiab Tsūdī-aon Dī-unusen!khaib !Oabasa koasa mā tsî ge mî, ǁgau!nâs di ǀomkhâisas ra ǂkhâ!nâ tsî ǁnās ǁgau!nâs tsî ǁkhāǁkhāsensa ra ûi-ûi!nâ !khaisa.