ONDOBE – Oipongolo yomukulunhuwiliki wehongo moshitukulwa shaMusati nale Laban Shapange osho ya fudikwa pomaendo ambulavo mOndobe.
Eshi osha shikula efindano lovakwapata vaye ovo ve shi pondola okupewa oufemba opo oshimhu shaye shi fudulwe mo moshana kOniipa oko a li a pakwa. Shapange okwa li umwe womoihakwanwa yotete yoCovid-19 moshilongo okwa xulifile momafiku 3 Septemba 2020 moshipangelo shaNandjokwe. Eshi osha eta opo a pakwe kOniipa koshitukulwa shaShishikoto kouministeli, nofamili yaye kaya li ya efwa i ye po popepi nombila yaye. Onghalo oyo okwa li ya talika ko ihe shi yopanhu, noihe na efimaneko lomufi ile lovapopepi naye. Ovakwanedimo, mwa kwatela omufiyekadi nounona vaye ova twala oshinima eshi komhangu opo va pewe oufemba woku mu fudula mo voo ve ke mu paake komaendo eongalo lavo kOndobe mOshitukulwa shaHangwena.
MOlomakaya, ovakwapata laye okwa li va ninga oshivilofudiko, osho kwa li va kwatela kumwe noshivilo shediko lemanya pOndobe.
Jeffrey Shapange omonamati waye woshiveli, okwa hokolola ta ti kakwa li shipu okukondja fiyo va eta xe pOndobe.
“Otwa kala nokukondjifa okudja omudo 2021 hatu pula epangelo li tu pe epitikilo tu fudike tate keumbo ashike epangelo inali hala. Meme okwa ninga onghendabala yokuya komhangu,” ta ti.
Onghee okwa ti paife ove udite ombili eshi xe a fudikwa peumbo molwaashi kakwa li hava kofa. “Kakwa li shipu okumona tate ta fudikwa mokandobe komeva. Ombila yatate okwa li hai talama omeva pefimbo lodula,” ta ti. Pefimbo tava patulula emanya, ovo va li po ova li va nyika oluhodi neenghono, nonande Shapange a xulifa konima yeedula mbali.
Oshiwana kakwa li sha mona omhito yokufika keumbo laShapange omudo a fya molwaashi omwaalu wovanhu okwa li wa ngabekwa. Noshivilo osho sha ningwa okwa li sha nana ovanhu vahapu shaashi kava li va mona omhito yoku mu lila. Onghee ovapopi va yooloka ova tanga Shapange ongomulumenhu kwa li omunambili, omulumenhu e na elandulafano, omuleli woshili a dana onghandangala yakula moshikondo shehongo.
Fillipus Haulofu omufitaongalo mukulu meongalo laNdobe okwa ti Shapange okwa li omushiinda muwa, omulumenhu ha yambidida ovanhu momukunda. “Shapange okwa yambidida yoo vali oinyangadalwa ya yooloka meongalo laNdobe,” Haulofu ta ti. Onghee okwa ti okwa pandula ovakwapata vaShapange eshi va longa noudiinini nokushipondola oku mu eta keumbo.
fhamalwa@nepc.com.na