Windhoek
Rice ye limwa kwa simu ya Kalimbeza mwa sikiliti sa Zambezi i tabe ibile fa misika ya naha.
Ba katengo ka lipulukelo mwa njimo ni likelezo ni ba AgriBusDev ba talusa kuli, rice ye limwa mwa Namibia i tafumaneha mwa lintolo za naha ka miňolo ya lisupo zakuli ilimwa mwa naha, kala 10 Muyana. Rice ye fita fa bwima bobufitelela litani ze mashumi a supile kuzwa simu ya naha ya Kalimbeza mabapa ni Katima Mulilo mwa Zambezi i tabe isizwe mwa lipisinisi za mwahali,” kutiseza muzamaisi wa AgricBusDev, Petrus Uugwanga kuba mutende wa New Era la Mubulo. U ize, mwa nako ya cwale, basweli kuswala swala kufeleleza musebezi ni kuli kulelilwe kuekeza rice kaku i minihanya habeli kwa buňata mwa isaho. “Luna ni chiseho ni buitomboli bwakuli lutabe luminihanyize rice ye habeli. Silimo sesitaha itaba litani ze 170, kufitelela kapa kuminihanya halalu kubapanya ku ye luna ni yona.
Mukwa wa kubeya rice ya Kalimbeza fa misika ya naha i bile ni tiyeho-nyana kuzwa fa kukwalula simubuzo milelo ya ba AgriBusDev lwapili ni kubeya rice ye kutulwa mwa naha fa misika ya naha mwa Mbuwana unumwaha. Kukwalula simubuso milelo yeo, Likwambuyu wa Njimo, Mezi ni Mishitu John Mutorwa u ize, u na ni sepo ya kuli buňata bwa rice butabe buminihanyizwe habeli kapa halalu mwa silimo sa 2016. Mutorwa u ize, kutaha kwa rice ye limilwe mwa naha, kutaha ni lisepiso kwa sichaba zakuli i izo pasa litatubo za bakatengo ka Namibia Standard Institution (NSI).
Rice haina likokwani za sumpwa kapa tutowati twa sifanu, kacwalo i makete kwa kuchiwa ki bo kamunu iluki,” a talusa.
Kataba ya kubata kuziba haiba rice netatubilwe kwa matuku, likwambuyu u ize, ki kwa butokwa kuziba kuli rice ki yelenga ni sumpwa kapa mulyani wa sifanu o lemuhilwe. “Ki rice ye makete. A luikumuse ka rice ya Kalimbeza ka kubona kuli i ba ya zemwi ze muleka ka zazi.
Ba AgriBusDev basebelisana hamoho ni ba Agro-Marketing kubeya ba Trade Agency ya Namibia kuitenga mwa litumelelano ni ba lintolo ba bashutana-shutana kukona kuleka rice ye limwa mwahali a naha. Mwa nako ya cwale, i fumaneha feela kwa musika wa makunganelo wa ze tala za naha (National Fresh Produce hub) kwa Ongwendiva ni Rundu ni kwa simu ya rice ya naha ya Kalimbeza.