Auleria Wakudumo

Omulumenhu weedula 25 ota mono epango lopaunamiti moshipangelo shepangelo mOshakati sha dja eshi a yashwa nombistoli mokwooko eshi vati ali ta kendabala okunyeka omushingi wotuwa yonhumba. 

Omukulunhu koshikondo shokukonaakona oimbuluma mOshana, Deputy Commissioner Frederick Ndjadila okwa holola ta ti omulumenhu ou okwali va tula omamanya mopate nelalakano navakwao nelalakano okuponokela nokunyeka ovanhu veli meetuwa – ngeenge va mono oshiponga ile va kanghama. 

Omulumenhu ou ota feekelwa eli vati oshilyo shongudu yovalongi voimbuluma veshiivike nawa ovo hava tula omamanya mopate opo i nyeke ovanhu oinima yavo mOshakati. 

Otaku hokololwa kutya otuwa eshi ya kanghama, ovalumenhu ovo ova ponokako ngeno va nyeke omushingi oinima yaye ashike omushingi okwa kufa mo ombistoli nokuumba.

“Omushingi okwa umba ondjebo eshi a mona ovafekelwa tava ponokele otuwa yaye noholo oya ka yasha omufekelwa ou mokwooko,” Ndjadila ta ti. 

Omushingi keshiivike fiyo opaife shaashi inekeli lopota kopolifi ile a tule mo oshibofa sheponokelo omanga omufekelwa a tula mo oshibofa shekendabalo ledipao. 

Oshiningwanima shikwao, ovatalelipo ova tulwa mokatoo ndele tava ponokelwa nokunyekwa oinima yavo mOshakati. 

Otaku hokololwa ovatalelipo vali va kalanda oikulya poShana Mall mOngwediva eshi otuwa yavo ya mona kutya otuwa yavo oina oupyakadi wonhumba. 

Ova pula vati okamati kali po opo keva twale kongalashe yonhumba ya patuluka. 

Ovatalelipo ova shinga mewiliko lokamati fiyo okolukanda Ehenye. 

Eshi va fika ova hanga po ovafekelwa vavali ovo va ponokela ovatalelipo neembele oshoyo omakatana nokuvanyeka oinima yavo. 

Ovatalelipo ovakwashiwana vaFrance. 

Ova nyekwa omaliko ena ongushu yoN$144 000 omo mwa kwatelwa eengodi, omafano,eelaptop, eevili nomakende okomesho. 

Ovafekelwa ova fiya vati vatwa otuwa yovatalelipo neembele manga inava faduka po. 

-wakudumoauleria@gmail.com