Mo Venduka
Gumwe gomapenda age hena ministera gonomukunda, epangero Lyonodoropa, mambo nekuliko nomukunda doponze kamarada John A. Pandeni kadogorokere moutano 7 Nsinano 2008.
Age kadogorokere nonomvhura 57. Simpagwa esi kasihorokere 20km osike modoropa za Grootfontein kutundilira ko Kombat. Age hambara aze ko Caprivi noyirugana. Simpu sendi kavasiretere ko Venduka ezuva lyoolyo nodira zovakwayita. Simpu kava sitambwire nkuru ministera Nahas Angula Vaministera Vakwawo, Varugani Vemepangero nava wokomberwa zonene za SWAPO. Presidente Pohamba mosondaha Ngurova yipo kakadingwire vekoro lyanakufa Pandeni. Presidente Pohamba yige gomuhowo mokugava mbudi zendi zoruguwo moutano moomo kayihorokere zize kekoro. Age kayi mutukukisire nahena nokuyipurasi asi ana tusigi. Pandeni kwakere murwi gwa PLAN gahana kutjira, kwakere ngundi za PLAN ramba ngako SWAPO mwene.
Apa kapi tatu tamangere asi Namibia ana zumbanesa ependa, mpitisili gwa navenye ogu gageve eparu lyendi nalinye asi ngano sirongo simanguruke eyi yahoroka. Pandeni rutu rwendi kava karugwene 50m nehauto eli kagenderere. Age gelike kadogorokerere poopo ano ava vavali musingi nomukungi gwendi Jacob Haindongo na Gerald Paulus kavaremanene ngesi moveli mosipangero. Ehudi kuna kuligazarera asi eretesopo lyalyo musenete morwa mvhura kazirokere. Vamwe kuna kutanta asi musingi kapi kavhulire kukontorora ehauto eli, yiyo kayi twarederere lika tembere montopo nokusindumuka. Pandeni gumwe gononkwate gaka kere go Robben Island na Ben Ulenga na Petrus Iilonga, mo 1980. Apa gakatengwire mo 1985 taya totopo mbunga ezi vana kutumbura asi NAFAU nokukara hamutjanga ntoni, ezi gapitisilire dogoro mo 1992, dogoro papa ana ya kara kansela ndi asi nguuru gwa Khomas.
Mokuwiza kwendi megendeso lya SWAPO, age kwamuhorowere akare gumwe gokomitiye zo ntjima-ntjima za SWAPO. Mo 1991. Amo mo 1997, Pandeni Kwamuhorowere mo Polit Buro no kukara hena hamutjonga ntoni gona gombunga za SWAPO, nokuyamutengwidiramo hena mo 2002.
Age kwakere mevango eli kumwe nokukara asi nguuru gwa Khomas ure wonomvhura 12 dogoro mo 2004. mo 2005, Pandeni yipo vamupere akare ministera gonomukunda nomapangero gono doropa, mambo nekuliko nomukunda do ponze. Mombudi zendi zoku hengagwida Pohamba katente asi Pandeni ngava mudiworoka kweyi garugana ponontambo dokulisiga – siga. Age ngapitisire elikwamo eli lyokureta epangero kovantu, nokuturapo ukwawo nonompitisili dopampo.
Age katanterere mukada nakufa asi nomfa daPandeni kapisi nyovelike dina gumu, kuna gumu va Namibia navenye. Age kuna sigi mukadendi, vana vane, Iita, Pendukeni, Shafana na Vilho no guhwe John Shikongo Pandeni snr.