Abraham Mwanyekange 

Kansela woshikandjohoololo Ongenga moshitukulwa Ohangwena Joseph Nenghwanya okwa ti ota ka yandja oshipopiwa momutumba woshitukulwa shOhangwena omo ta ka pula opo Omungwelume u katulwe pomufika wodoolopa. 

Kansela odo okwe di popya pefimbo ta popifa oshiwana shaNgenga Olomakaya eshi kwa li tava dimbuluka efiku lemanguluko pOmungwelume. 

Nenghwanya okwa ti opo onhele i tulwe pomufika wodoolopa nena oli na okukala la wanifa po omaukwatya onhumba. 

“Omayakulo aeshe omo e li omu, kandi wete epangelo tali anye okutula Omungwelume pandodo yopadoolopa,” ta ti. 

“Aishe omo i li mOmungwelume omu, opolifi, okapangelo, eesekundofikola, osho yo eefitola,” ta ti. 

Okwa weda po ta ti eefitola otadi yambula po eliko nokuyandja oilonga kovanyasha ve li momudingonoko waMungwelume. 

Kansela okwa ti natango mOmungwelume omu na omaumbo e li pamufika woshinanena. 

Naemi Josephine omukalimo womOmungwelume okwa ti ota yambidida omadiladilo akansela. 

“Ei onghundana iwa opo nafye tu tyapule omauwa oo haa yandjwa meedoolopa. Otashi ka eta po eemhito doilonga,” ta ti. 

Martin Nakale okwa ti nonande ota yambidida ediladilo lakansela oku na omalipulo ngeenge Ovamungwelume ove lilongekida tuu va tambule ko odoolopa ngeenge osha tulwa moilonga. 

“Ondi wete ovanhu ve li unene moshikulu shonale shaashi vamwe ovo ve na omapya e li popepi otava twikile ashike nokulima omapya,” ta ti. 

Okwa weda po ta ti ke wete tava hale okutembulwa po va yapukile omahumokomesho odoolopa. 

Ediladilo lakansela ngeenge ola tambulwa ko Omungwelume otau ka kala odoolopa onh inatu moshitukulwa Ohangwena. 

-abbenghilai@gmail.com