Ombelewa yakansela woshikandjohoololo shaNgenga moshitukukulwa shaHangwena, oye lipyakidila nokumanifa opoloyeka yeexuxwa oyo ya teelelika i ka kale momukunda Okambebe, meni loshitukulwa.
Opoloyeka oyo i li koshi yewiliko nekwatelokomesho lakansela woshikandjohoololo shaNgenga, Joseph Nenghwanya oya teelelika i ka kale tai yandje omakwafo e lixwa po kovakwashiwana komesho yeemwedi nhatu.
Nenghwanya edi okwe di popya pefimbo leenghundafana davo naKundana, eshi a li ta yandje omanenediladilo aye e na sha nexumokomesho, osho yo eyambulepo leliko loshikandjohoololo.
“Ediladilo loshikuku sheexuxwa onda kala nale ndi li na, pefimbo nda li oshilyo shokomitiye yovanyasha moshikandjohoololo, ashike omolwoikwa noipangifo, ondjodi yange kanda li nde i twifa,” ta ti.
Okwa twikila kutya paife eshi a pewa eenghono dakula dokulela oshikandjohoololo, okwa kwatwa kedilaadilo lokunenepeka, nokutula opoloyeka yaye moilonga opo i dule okukwafa oshiwana.
“Opoloyeka yo vene oya nuninwa ovanysha, osho yo ava ve li momaumbo itava dulu okulikwafa vo vene. Ngeenge aishe oya wana po noya pu okutulwa peenhele, otwa hala oku ka yandja eexuxwa osho yo omai kovakalimo oshali, vo vadule oku ke litamekela eengeshefa davo dopedu vo vene,” ta ti.
Elalakano oku kwafa ovanhu vomoshikandjohoololo shange, opo va dule okukala have linyangele omboloto yavo kuvo vene, ta yelifa.
Nenghwanya okwa ti opoloyeka yeexuxwa ngeenge oya kulu, itai ka kwafela ashike ovakalimo vaKambebe, ndele otai ka kwafela yo vali ovanhu vopomikunda dopoushiinda waKambebe.
Ovanelao ava tava ka kufa ombinga mopoloyeka ei, vati otava ka pewa yo edeulo lonomenawina, nghee ve na okutekula eexuxwa, opo di dule okudala omai ahapu, do di dule yo okuya pondodo yokulandifwa.“Shaashi oshikuku osha tungwa popepi nomboola oyo ihai longo vali, ondi na omadiladilo yo omboola oyo i longwe, yo i dule okuyandja omeva kovakalimo. Popepi nomboola natango ondi na ediladilo, opo ndi ninge po oshikunino shovakwashiwana, va kale tave likwafele apa naapenya,” ta ti.
-taimihaihambo2000@gmail.com