Omupopiliko wopolifi moshitukulwa shaHangwena Warrant Andreas Nghiyolwa okwa koleka ta ti okudja omudo 2023 ka pena omunhu a kwatwa po mekwatafano ledipawo lomuhongifikola Natanael Nghihalwa a shivika nawa Thabo. 

Pefimbo a ninga eenghundafana naKundana onghela, okwa ti oshiwana otashi ende na kashona okuyandja ouyelele kopolifi. 

Onghee okwa ti eshi oshi li eshongo linene la taalelwa kopolifi okumona ouyelele kombinga yovafekelwa va dipaa omulumenhu ou. 

“Fiyo opapa opolifi inai mona ouyelele woumbangi wa yela,” ta ti. Okwa ti natango opolifi onghee ngaho tai twikile nokuninga omakonakono kombinga yedipao lomuhongifikola ou. 

Nghihalwa okwa xulifa pefimbo kwa li e na omido 39, omudo 2023 muNovomba efimbo loufiku konima eshi vati a yashwa nondjebo kovalumenhu vavali nokufaduka po.

Oshiningwanima osha ningwa meumbo lavo momukunda Oshikwiyu moshitukulwa shaHangwena. 

Ota ku hokololwa kutya Nghihalwa efiku olo okwa dja pendingosho yaye i li mOmungwelume omo kwa li e kelikosha. Okudja opo manga kwa li tadi kokalikoshelo okwa ponokelwa kovalumenhu vavali noku ya shwa lwoikando ya yooloka ndele ta xulifa. Ovafekelwa ova teta yoo vali otuwa yaNghihalwa nomakatana komalola. 

Omuhongifikola ou meumbo okwa li e li mo namumwainamati pefimbo loshiningwanima.Onghela umwe womumwainamati waNghihalwa okwa popya ta ti kave udite ombili shaashi vati opolifi itai longifa ouyuuki moshibofa eshi. 

“Ope na omunhu taku fekelwa kutya oye a dipaa ondenge yange ashike fiyo opapa opolifi kai na eshi ya ninga po. Fye ongofamili otwa handuka,” ta ti. 

Okwa yelifa ta ti omulumenhu oo vati ta fekelwa kutya okwa dipaa paife oha kala koAngola. 

-fhamalwa@nepc.com.na