Omupedu hamushanga wongudu yoSwapo Uahekua Herunga okwa ti ombelewa yaye oye li pyakidila nokukonga ouyelele ngeenge omulukupe oo kwa li a kwatwa po molwashi a piyaneke oshoongalele shoIPC, oku li tuu shi li oshilyo shoSwapo.
Okwa koleka ta ti fiyo opapa ka pena ouyelele ta ulike kutya omukulupe oo oku li shili oshilyo shongudu yoSwapo.
Mexuliloshivike omulumenhu weedula 73 Kavila Kautsima okwa li a kwatwa po shaashi vati kwa li ta piyaneke oshikonga shomahoololo shongudu shoIPC.
Oshikonga osha li kodoolopa yaUtapi oko IPC a patulula ombelewa ipe efiku olo.
Otaku hokololwa omukulupe ou a shinga otuwa yaye a yuka mokati kovayambididi vongudu yoIPC ovo kwa li vangudumana pombelewa ipe opo a puma noku monifa omunhu umwe oshiponga.
Kautsima okwa pewa omhito yokulifutila mo modolongo noshimaliwa sheeN$3000 pefimbo a holoka momhangu yaUtapi Omaandaxa.
Oshibofa shaye osha undulilwa komafiku 17 Sepetemba 2024 nomakonakono opolifi otaa twikile.
Herunga okwa ti konima ngeenge ova mono kutya omukulupe ou oku li oshilyo shoSwapo otava ka popya naye nokumuningila omapulapulo kutya omolwashike e na okupiyaneka ovanhu ve li komutumba wavo.
“Swapo ongudu tai lalakanene okukaleka po ombili moshilongo. Ina tu hala okuuda oshilyo shongudu yoSwapo tashi li puma mumwe novanhu,” Herunga ta ti.
Okwa ti Swapo okwa popya nale noveleli koitukulwa ya yooloka opo va yandje ehongo nouyelele koshiwana kombinga yomaliumboto oikonga yomahoololo.
Okwa kumaida Ovanamibia opo va kale nombili pefimbo lokuninga oikonga yomahoololo.
Eshi a kwatafana naKundana omupopiliko wongudu yoIPC monooli, Eino Heelu okwa ti pula okakomishi ha kaungaunga nomahoololo koECN opo ka kale ta ka yandje ehandukilo lokufuta oshimaliwa kongudu keshe tai ka kadja omunhu ta piyaneke oikonga yomahoololo yeengudu dikwao.
Heelu okwa ti ECN okwa dopa shaashi ina yandja ehongo koshiwana nghene shina oku li umbata ngeenge ta ku ningwa oikonga yomahoololo.
Okwa hokolola ta ti omukulupe oo ta ku fekelwa kutya oku li omuyambididi woSwapo okwa ninga epuko la kula nokwa ulika efano lii koshiwana.
“Ina tu mona nale oshikumungu sholudi eli, Namibia oshilongo shina ombili nelandulafano. Otwa hala eengudu adishe dopapolitika di kale ta di ningi oikonga yomahoololo pehe na omatilifo ile omalipumo mumwe novanhu veengudu da yooloka,” Heelu ta ti.
Okwa hokolola ehe udite ombili kombinga yovayambididi voSwapo vati va tula omapandela ongudu yavo yoSwapo popepi nombelewa yaye oyo ya patuluka moUtapi.
“Paife omiti odo di li popepi nombelewa yetu ipe oda tulwa omapandela ongudu yoSwapo,” Heelu a weda po.
-fhamalwa@nepc.com.na