Hilma Nalupe 

Osipana yaalumentu ye li kohi yoomvula 21 muudhano wohoki oya ningi ondjokonona mOlyomakaya sho ya sindana oshikando shotango mekopi lyuuyuni ndyoka lya li koIndia. 

Namibia okwa dhenge Egypt ookoola 4-2. Esindano ndika olya simana mondjokonona oshoka osho oshikando shotango Namibia ta sindana mekopi lyuuyuni lyohoki, shoka tashi ulike kutya osipana ndjika yaagundjuka oya ilongekidhila uudhano mbuka. 

Namibia okwa li a ulike eyitulemo, elongelokumwe osho wo eyinekelomwene muudhano mbuka. 

Ookoola odha li dha tulwa mo kuLiam Bruys, James de Jager, Josh van der Merwe naJohn-Paul Britz. 

Omanga dhaEgypt mbali dha li dha tulwa mo kuMohab Hegab naAbdel r ahman Kasem, ashike nando ongawo Namibia okwa li e shi pondola okutula ombunda moshihwa nokusindana po uudhano mbuka. 

Josh van der Merwe oye a li a sindana po epepa lyomudhani dhingi muudhano mbuka, nokwa li a popi kutya okwa pandula aadhani pamwe naye. 

“Owa li uudhano wa kukuta. Otwa kala twe shi nongela nawa kutya uudhano mbuka itawu ka kala uupu, ashike otwa li twa sila esindano enota, noshi li etumba enene okusindana uudhano mbuka,” ta ti ngaaka. 

Namibia okwa li a dhengwa 12-1 kuBelgium, ngoka oye gumwe shikwetepo muudhano mbuka waagundjuka mEtitano, ashike shoka inashi ya tulitha omutse kepepe, noya ulike uupenda wawo sho ya tsakanene naEgypt mOlyomakaya. 

Sho ya dhana naBelgium, okoola yaNamibia oya li ya tulwa mo kuMathew Lassen. 

Omudheuli gwaNamibia Johan Weyhe, konima yuudhano wawo naBelgium, okwa li a thamuna ndhika,” Aadhani ayehe yaBelgium ohaya dhana pamuthika gwopombanda. 

Shoka kali shi eyipopopilo lyetu, nonda itaala kutya otwa li twa ndjiki oonyala mevi notwa kambadhala ngaashi tashi vulika.” 

Namibia ngashiingeyi ota ka taalela Spain ngula moMadurai. 

-hnalupe@nepc.com.na