I Kae Matundu-Tjiparuro
EZORONGONDO
Ovimbumba vyOmbanderu omayuva womasuviro ngazuko vya woronganene petundu romuyaruke Ombara Munjuku II Nguvauva muno okuundja, okupuratena na wina okurira ozohatoi ovini kutja otjiwana tja Nguvauva matjiurike une ngumayaruka motjihavero tjouhonapare wOtjinguvauva nu wina ngumatjiyandja komuhoko otjombara yOvambanderu.
Otjipakarere votjiwana tja Nguvauva mo Namibia ngaa kOtjawana waronganene muno. Mumbazire ko Tjawana mwari Ombara yOvambanderu va Tjawana, Nguvauva Nguvauva, Manuel Nguvauva, omwatje womuyaruke Ombara Munjuku II na Ngaova Kandovazu, ongundue yovanatje.
Otjozongombe ndaombo mounyanu wao vaombere kehi yomiti. Ngunda amaveundju otjiwana tja Nguvauva okuhakaena otjimbumba kehi ya Majora Kapanda Marenga tjawiririre momatangero na tjiutu neumburiro indi ndimaritja “matuyenderwa ombara ngumeya mouhona we” okuraisa kutja tjiri tjaundju ombara yatjo oyaruke yomotjihavero orure nu tjina ozongama zokwiimuna.
Omaimbo inga omuhoko ongutja tuarere natjihingi nawo nganduu tjakarira omapeta ape mozondatu otjiwana tja Nguvauva kehi yaihe nomutize watjo, Peter Nguvauva, tjitjaetere ombuze ovengi ndjivari amaveundju. Ombuze yOmbara yOvambanderu.
Eye onguri Killus Karaerua Nguvauva, wina nguri o Ministera yOkehi yOmahundju nOvize vyo Mokuvare. Otja kondjivisiro ya Peter Nguvauva otjiwana tja Nguvauva tjahongerwe iyorutuu omuyaruke Ombara Munjuku II omuni nduatjangisa natuako omunwe we kembo tjiyari 9 ku Ndengani mo 2001.
Ombongarero yo Tjinguvauva makuu yaire kumwe pendje noserekaze yomuyaruke ombara Munjuku II indji Aletta Karikondua Nguvauva, nguri inaa yomwatje wombara ingwi Keharanjo Nguvauva, wina otja komauhatoi warwe ngukuza Ombara onguyaraa okumumupingena motjihavero.
Oserekaze yaraisire okuhina ohange nokutja oyo ootjina tjiyakupirwa okupa omuyaruke Ombara omwatje ngumemupingene motjihavero nu nambano hapo tjike?
Otjimbumba tjitjaripo tjiayakurire Karaerua Nguvauva nokuhina epuriro rimwe rahungamisirwe kotjiriro pendje nokutja tjavangere okutjiwa nokuzuva motjino tja Keharanjo owmini kutja eye matjavi otjomundu ngukuza oomwini wotjihavero ihi.
Kehranjo owmini waraisire kutja eye kaatjiwa kutja nangwari ihe omuni uvanga pi nu tjee kumuna orutuu ihe omuni maraisa ondero ye eye otjehina okupenga ondero yaihe otja tjeyiraisa morutuu indui.
Orutuu indui pendje nokutja Karaerua ngarire ngwayaruka motjihavero tjouvara wa Nguvauva rwaraisre kutja omuyaruke Ombara Munjuku II onganda ye ya Tjawana warumatisa ku Manuel na Keharanjo. Oserekaze yomuyaruke Ombara Munjuku II wahatoire kutja orutuu rombara indui mairutjiwa.
Yari ongahukiro kokutja otjimbumba tjitjavazere povitjitua imbi tjari nohange nomaurikiro wa Karaerua nu omatjivisiro wombuze indji ya kongorerwe iye nyando nondjoroka. Posyo mapenika ayo inga kangeri omayandero wondjakaha mOmbanderu tjinga otjimbumba iho tjarwe tjOvanamutjemo, tjitjihari povitjitua imbi, atjiyakara nohange tjinene mokutja ingwi owo nguvezera nu nguvemuna kutja oomwini wotjihavero tjouvara wa Nguvauva, Keharanjo, kangwazikirwe mutjo.
Otja kuwo pena omaraa ngaraewa kutja Keharanjo ngayaruke motjihavero nu hapo kuwo makuhewavi. Mavetja Otjinguvauva otjovakwate vovanatje aveyevari imba vasere kutja vatara momaraa ayehe pendje nokuungurira korutuu rOmbara aruyerike.
Otja kuwo nambano tjitjasere okutjitua omuhoko auhe okuhaveha omaraa ayeevari, worutuu nowokotjinjo nu tjeri ohepero omuhoko autoorora pokati ka Karaerua na Keharanjo. Wina Ovanamutjemo mavetja orutuu ndumaruheewa kaverwii.