KATIMA MULILO – Batikitibi ba katengo kakatibela litaba za bulyangalino (ACC) ka tapisize muzamaisi wa sikiliti sa Zambezi, Lawrence Sampofu mwa mabulatwi a kuli na fumani mubu wa mayemo amande ahulu kwa munanga wa nuka kwa Katima Mulilo ka nzila ye masila.
Lila mwa tolopo neba mumunjuzi kwa katengo ka kalwanisa litaba za bulyangalino ka kumutama litaba zakuli u fumani mubu o munde wa lipisinisi kwa mukulela wa nuka ya Lyambai ka mukwa wa bupumi. Mwa taba ya mabulatwi yeo, ne kukulubelwa kuli Sampofu na filwe ndao ya mubu wo mahala isi kamulao. Taba ye itile mwa nako yekuswani feela kuzwa nako yeo bayahi ba tongoka taba yakuli ba beleki ba tolopo ba file mizwale ni balikani babona mibu fa halimu a bayahi bao nebali fa mukoloko wa babalitezi kufiwa mibu ki katengo lilimo- nalilimo. Ka kualabela kwa lipuzo kuamana ni mabulatwi a mubu wa nafumani mueteleli was sikiliti, muokameli wa tolopo ( Mayor) ya Katima Mulilo Charles Matengu u latuzi mabulatwi ao sina ba katengo kakatibela bulyangalino haba fumani kuli ki mabulatwi.
“Batikitibi ba katengo ka katibela litaba za bulyangalino nebaliteni kutobatisisa kono a basika lufumanela mulatu. Sampofu u fumani mubu kanzila ye kenile, kwande a cwalo ba katengo kakabona za bulyangalino kambe ba tamile,” kwa talusa Matengu. U zwezipili kutalusa kuli u ngangamaniswa ki sichaba seo sizamaya sihasanya litaba za mabulatwi ni kuekeza kuli basweli kunatifisa taba ka kuibapaza bona baňi sina a kuatumezwi liketisa, ni kuli u lemuhile bao basweli kulubaluba libizo lahae ka milelo ya kuitekisa bona baňi mwa litaba za naha. Muňoli yo muhulu wa tolopo ya Katima Mulilo, Charles Nawa u tiselize taba ye bulezwi ki muokameli wa tolopo (Mayor) ya kuli mueteleli wa sikiliti nafilwe mubu kamukwa o swanela nihaike nasika tungulula butuna bwa wona mubu wo. “Kafo mubu u kuma ni sibaka a u kuami kono taba ki yakuli mueteleli wa sikiliti u kupile sina yomumwi ni yomumwi mi kupo yahae neiamuhezwi. Neli feela mabulatwi mi akuna kweta ni yekana. Ki kalibaka mani mueteleli kapa na kasibi a basika ni tama ba katengo ka katibela bulyangalino haiba luamuhezi kweta,” a buza. U file mamela ya bao basweli kuhasanya mabulatwi, ka kutalusa kuli ki hande kuikambota litaba za zwelopili ze zwiseza sikiliti kwa pata kufitela kusinyasinya mayemo a katengo ka tolopo.
Nihaike kuli Sampofu u lumezi litaba za mabulatwi kuli liteni kono u hanile kufa taba kakutala.