KATENGO ka kwamukunda kaka ipondile mwamisebezi ya basali ni kutumusa linonge ze shelana ze esha ni kufilikanya basali, seka tumusize linonge fahalimu ya mapokola ka kubulela ka kutongauka luli kuli, mapokola banze ba sweli kuno sebelisa linzila kapa muhato o silafezi ahulu mwalipatisiso za bona, kona haba sa swali libulai kapa sibulai sa mazazi a cwale sesi sweli kuno bulaya ni kupumaka batu sihulu basali.
Katengo neka fitisize linonge ze ka kuyema fa lipatisiso za lifu la mufumahali Sanna Helena //Garo?s yana kilwe a bulaiwa cwale hamohocwalo ni mufumahali Juanita Mabula ili basali kaufeela bona bene ba kilwe ba pumiwa litoho haa, lilama za bona za mubili neli kilwe za yumbakelwa mwa libaka ze shelana.
Se kubile ni tumuso ya kuli sikwata kamukana sa mapokola ki sona sa kunyaza mwa likezo maswe kaufeela ze kakuli, ba ban`wi mapokola ba bana ni zibo ya musebezi kubeya lilimo ze pahami za musebezi o swana ba tuhelanga kapa kulilimanisa musebezi wa bona ka mabaka a kuli ba kungulelwangwa kwatuko hakuamwa za kunanulwa fa musebezi mwalipula za bona.
Yana kile a bulela fahalimu ya katengo neli mufumahali Rosa Namises ya talusize kuli mapokola ba swanela kumbalamanisa buitukiso ni mihato sakata ya kusebeza ni litaba ze swana.
Namises na kile a bulela kuli kuzwa lifu la mufumahali Mabula li tumuswa, mapokola banze ba ‘kuzize’ mi kacwalo u komoka na nji kukuza ko kuswana ki kona ko ku ta sebeza kapa kuzwelapili ni mwanako ya cwale ye ya lifu la mufumahali Helena.
Na kile a tumusa kuli mapokola ba swanela kusebeza katata luli ili kuli libangoki kapa sibangoki si swaliwe pili kezo yen`wi ye sabisa ye swana isi ka kutela.
“Kin`I ha kubonahala kuli mapokola haba sebezi katata kapa ka lihola kaufeela za lizazi? Kubonahala kuli ba mitayi ya makande bona ba sebeza kufita mapokola. Hakuna lisupo ze bonisa ni kusupeza kuli mapokola banze ba sweli kuno eza lipatisiso za bona. Ni tabela feela kubiza mapokola kuli ba tahe ni buitukiso bwa bona bo ba ezanga haba sebeza ni litaba ze tuna ze swana sina ze,” ne kubulezi Namises.
Namises na kile a tumusa maswabi a hae a kamo mapokola ba sebeleza fa mikwakwa.
“Mapokola bafa mikwakwa ba buzanga feela kaza pampili ya bukwaezi. Haba nangelangi ni mwalipula kapa libaka zen`wi za motikala kuli ba kone kuseca hande. Fo kun`wi o haba tatubi limotikala zen`wi. Ba zibahala ahulu ka buzwa kona libangoki ha linze li sweli kuno bapala ni bona.”
“Lilama kaufeela za nyandi neli kile za fita fa mikwakwa ye shelana ya naha ye cwale ka Okahandja/Windhoek ni Rehoboth/Windhoek kubeya Gobabis. Cwale ka yona kezo ye mutu u kona kuhupulela cwan`I mapokola ba luna. Ona lisupo ze kiza kuli mapokola ba ozela fa misebezi ya bona.”
Mupokola yo muhulu, Angula Amulungu sa kupile pilu telele kwasicaba ka kubulela kuli mapokola banze ba sebeza katata luli kuli libangoki li tiswe pila mulao.
Amulungu na tiisize kuli mapokola bata sebeza katata luli ni kubona kuli libangoki li tiswa pila mulao mwanako ifi kamba ifi.
“Muswale manzwi a ka a, nako ita bulela ni kutaha ibe mazazi a kuma kai, luta swala libangoki ze kaufeela. Mwanako ya cwale ha luna bupaki bobu tezi hande sina hane ni bulezi kale kuli musebezi ni musebelezo wa luna u ikena ahulu fa sicaba,” ne kubulezi sibuabui wa mapokola yo muhulu yena mutompehi Amulungu.
Na kile a kutela manzwi a hae ana kile a patalaza mwamamzazi a felile a kuli sicaba si swalisane ni mapokola.
Na kile a fitisa manzwi a hae a kukomoka ana kilwe a tumuswa kuli mapokola haba sebezi hande katata sihulu fa makwakwa afa mukwkwa kapa ona ma road blocks ka sikuwa.
Na kile a bulela hape kuli sipokola si taselizwe ki likayamana mwanako ya cwale kakuli ha sina batu baba n`ata mi ka cwalo mwalibaka zen`wi kwa tata falanga ahulu luli kuli mane mapokola ba kone kutatuba motika ifi kamba ifi ye fita.
Na kile a nitifaza hape kuli kamaniti mwalibaka zen`wi sa utwile kuli kuna ni mapokola ba ba buzwa ahulu baba sa tabeli kutusa sicaba ka bunako mi kacwalo ofesi ya hae inze sweli kulika katata luli kuli tatululo I konwe kufumanwa ka bu nako.